Santiago de Compostela, 26 de novembro de 2025

 A folga sanitaria convocada por dúas organizacións sindicais acadou, durante a quenda de tarde, un seguimento do 4,26 % na totalidade dos centros sanitarios de atención primaria da comunidade galega.

De acordo cos datos das sete áreas sanitarias que conforman o Servizo Galego de Saúde, durante esta tarde na área sanitaria da Coruña e Cee o seguimento da folga acadou o 4,2 %; na área de Santiago de Compostela e Barbanza, o 6,9 %; no caso da de Ferrol, 2,6 %; na de Lugo, A Mariña e Monforte de Lemos, 0 %; na área sanitaria de Ourense, Verín e O Barco de Valdeorras, o 0,88 %; na de Pontevedra e O Salnés, o 3,4 %; e na área sanitaria de Vigo, o 7 %.

A Consellería de Sanidade e as organizacións sindicais da Mesa sectorial CSIF, CCOO, UGT e tamén SIMEGA acordaron na xornada deste luns unha serie de melloras de tipo económico, organizativas e laborais para o persoal sanitario.

A sanidade pública galega está a responder axeitadamente á demanda asistencial que se presentou ata o de agora nos centros sanitarios galegos.

A Xunta continúa a traballar co obxectivo de ofrecer unha atención sanitaria óptima a toda a cidadanía e para acadar as mellores condicións laborais para o conxunto de profesionais, ben sexa na atención primaria ou hospitalaria.