Ferrol, 5 de decembro de 2025

A delegada territorial da Xunta en Ferrol, Martina Aneiros, visitou esta mañá as instalacións da comunidade terapéutica Tito Pena-O Confurco que xestiona a Asociación Ferrolá de Drogodependencias, Asfedro, beneficiaria recentemente dunha subvención da Consellería de Sanidade. Así, tal e como informou Aneiros durante a visita, a entidade percibiu unha achega autonómica de 50.000 euros para a reforma integral da accesibilidade da comunidade terapéutica no marco da convocatoria de axudas destinadas á realización de programas de interese xeral para fins de carácter sociosanitario no ámbito dos trastornos mentais.

Esta orde de axudas, dotada cun crédito orzamentario de máis de 1,3 M€ posúe varias liñas de investimento. No caso de Asfedro, beneficiouse da liña destinada a proxectos de investimento en melloras nos centros sanitarios e sociosanitarios cuxa actividade principal sexa o desenvolvemento de programas asistenciais e psicosociais ou preventivos en materia de trastornos mentais, incluídos os adictivos.

A delegada territorial lembrou que a entidade ferrolá tamén acometeu a substitución da cuberta envolvente do centro terapéutico grazas a unha achega doutros 50.000 euros de pasadas edicións desta convocatoria

Ademais de Asfedro, tamén resultou beneficiaria destas axudas dentro do ámbito territorial da Delegación a asociación Saúde Mental Ferrol, Eume e Ortegal. No seu caso, percibiu unha achega de 10.891 euros para o equipamento do seu centro de rehabilitación psicosocial e laboral.

A representante do Goberno autonómico destacou o incremento do 11,8% do orzamento consignado para o desenvolvemento deste tipo de actividades con respecto ao ano anterior e puxo en valor a relevancia da orde en tanto aglutina a maior parte das axudas do Servizo Galego de Saúde ao trastorno mental, permitindo financiar programas estratéxicos para avanzar na mellora da saúde mental da poboación galega.