O seguimento na quenda de tarde da folga sanitaria nacional contra o Estatuto Marco do Goberno central acada o 4,49 % na sanidade pública galega
Nos servizos de atención hospitalaria o seguimento da folga é do 3,54 %
No que atinxe á atención primaria, o seguimento da folga en rexeitamento do borrador presentado polo Ministerio de Sanidade acada o 5,85 %
Santiago de Compostela, 10 de decembro de 2025
O seguimento da folga sanitaria convocada contra o Estatuto Marco promovido polo Goberno central acadou o 4,49 % na quenda de tarde nos centros sanitarios da comunidade galega.
Así, a porcentaxe de participación nos sete grandes hospitais do Servizo Galego de Saúde, na quenda de tarde acadou o 3,40 %. En canto aos hospitais comarcais, o seguimento foi do 4,27 %. No seu conxunto, a actividade hospitalaria contou cunha participación na folga do 3,54 %.
Pola súa banda, no que respecta á atención primaria o seguimento da folga en rexeitamento do borrador presentado polo Ministerio de Sanidade acadou o 5,85 % de participación.
Por centros hospitalarios, o paro foi secundado polo 3,42 % no caso do Complexo Hospitalario Universitario da Coruña; o 0 % no caso do Complexo Hospitalario Universitario de Santiago de Compostela; o 5,45 % no caso do Complexo Hospitalario Universitario de Ferrol; o 2,82 % no caso do Hospital Público Lucus Augusti; o 4,44 % no Complexo Hospitalario Universitario de Ourense; o 5,97 % no Complexo Hospitalario Universitario de Pontevedra; e o 3,17 % no Complexo Hospitalario Universitario de Vigo. No conxunto dos hospitais xerais o seguimento medio da folga acadou, como se ten dito, o 3,40 %.
No caso dos hospitais comarcais, o seguimento acadou o 6,25 % no Hospital Público de Cee; o 0 % no Hospital Público de Barbanza; o 13,04 % no Hospital Público da Mariña; o 4 % no Hospital Público de Monforte de Lemos; o 0 % no Hospital Público do Barco de Valdeorras; o 0 % no Hospital Público de Verín; e o 0 % no Hospital do Salnés. No conxunto dos hospitais comarcais o seguimento medio da folga foi, como se ten dito, do 4,27 %.
En canto ao seguimento en atención primaria na quenda de tarde por áreas sanitarias foi o seguinte: área sanitaria da Coruña e Cee, 2,70 %; área sanitaria de Santiago de Compostela e Barbanza, 9,09 %; área sanitaria de Ferrol, 5,56 %; área sanitaria de Lugo, A Mariña e Monforte de Lemos, 0 %; área sanitaria de Ourense, Verín e O Barco de Valdeorras, 2,86 %; área sanitaria de Pontevedra e O Salnés, 6,67 %; e área sanitaria de Vigo, do 10,92 %.
Pola súa banda, en entidades sanitarias como son a Axencia Galega de Doazón de Sangue, Órganos e Tecidos (ADOS), a empresa pública de servizos sanitarios Galaria e a Fundación Pública Urxencias Sanitarias de Galicia-061, o seguimento na quenda de tarde acadou o 2,33 %.
O Servizo Galego de Saúde conta na xornada de hoxe coa cobertura do 100% dos servizos mínimos, garantindo a actividade asistencial urxente e de emerxencias.
