A Coruña, 27 de xaneiro de 2026

O conselleiro de Presidencia, Xustiza e Deportes, Diego Calvo, participou no serán de hoxe na entrega dos galardóns da II edición do Premio Terra de Hércules concedidos pola Fundación ‘Amare Terra’ para as persoas que  teñan promovido de forma exemplar o deporte e os valores do movemento olímpico e do movemento paralímpico ao longo da súa traxectoria vital. Neste sentido, o conselleiro destacou que, estes premios, recollen a “disciplina, esforzo, apoio, excelencia e paixón” que identifican ao deporte galego.

Diego Calvo lembrou aos premiados da edición de 2025, a primeira destes galardóns, e destacou a importancia de figuras como Conrado Durántez, Alejandro Blanco e María José Patiño, na divulgación, dirección e docencia do deporte; así como o Comité Paralímpico Español e todas as súas historias de superación.

Con respecto aos 14 novos premiados deste ano, o mandatario galego subliñou a capitalidade de nomes como os de Alfonso Ortega, adestrador e formador de atletas olímpicos; o Amfiv, en apoio a inclusión e cun equipo de baloncesto en cadeira de rodas campión de Europa; Augusto César Lendoiro, ex presidente do Liceo e do Dépor e ex secretario xeral para o Deporte; Aurora Martínez, pioneira da ximnasia rítmica galega e promotora do deporte feminino; Carlos Bremón, impulsor da natación e do surf galegos; David Cal, faro do deporte galego con cinco medallas olímpicas; Jesús Hermida, defensor do deporte na Transición e ex presidente do COE; José María Covelo, gran valedor do balonmán; Ramos Misioné, primeira gran estrela do piragüismo galego con dúas medallas olímpicas; María Dolores Rojas, xuíza esencial no atletismo galego con catro Xogos Olímpicos e Rafa Martín Acero, referente académico inigualable. Ademais, tivo un recordo especial para os tres premiados ‘in memoriam’ como José Mañana e o Colexio Karbo, principais mecenas do fútbol feminino galego; José María Valeiro, impulsor do baloncesto e Pablo Hinójar, figura imprescindible na ximnasia de Galicia e mentor de Melania Rodríguez.

‘Terra Move’

Na súa intervención, o conselleiro de Deportes destacou a plataforma de mecenado deportivo ‘Terra Move’ impulsada pola Xunta de Galicia en colaboración coa Fundación ‘Amare Terra’ e que xa leva recadados preto de 400.000 euros en distintas campañas. Neste sentido, amosou o seu convencemento de que esta ferramenta sirva para que “os deportistas de maior nivel sigan xurdindo nesta terra da que xa teñen saído uns 200 olímpicos e paralímpicos ao longo da historia”.