O 50% dos directivos do Grupo Barceló Hotels & Resorts formáronse no Centro Superior de Hostalería de Galicia
O director de Turismo de Galicia mantivo un encontro cos responsables de Recursos Humanos da cadea hoteleira que sumou en 2024 case 300 hoteis en 30 países
Santiago de Compostela, 29 de xaneiro de 2026
O director de Turismo de Galicia, Xosé Merelles, mantivo un encontro cun grupo de directivos do departamento de Recursos Humanos do Grupo Barceló Hotels & Resorts que estes días están a celebrar no Centro Superior de Hostalería de Galicia (CSHG) a súa reunión de análise de resultados. Durante a xuntanza, na que estivo acompañado polo director do CSHG, José Paz, Xosé Merelles agradeceu que conten co asesoramento e colaboración do Centro de Hostalería na selección do persoal e tamén cos alumnos e egresados do centro nos seus procesos de selección. Precisamente, o 50% dos directivos do grupo Hoteleiro son antigos alumnos do CSHG.
Os directivos de Barceló Hotels & Resorts eloxiaron a traxectoria do Centro Superior así como o proceso de selección previa do alumnado que realizan os responsables académicos para logo seren entrevistados para a realización de prácticas neste grupo.
Na xuntanza participaron responsables das diferentes zonas xeográficas de España e Marrocos, xunto coa directora Xeral de Recursos Humanos, María Carmen Oliver Molina. Barceló Hotel Group, división hoteleira do Grupo Barceló, é unha compañía de orixe mallorquina fundada en 1931 e cunha sólida traxectoria ligada ao desenvolvemento do turismo en España e á súa expansión internacional.
Con presenza en múltiples destinos vacacionais e urbanos, o grupo opera hoxe unha das maiores redes hoteleiras de orixe española. Segundo a súa memoria anual do exercicio 2024, Barceló Hotel Group conta con 299 hoteis en 30 países e máis de 65.200 habitacións. En 2024, o Grupo Barceló alcanzou unha facturación aproximada de 7.551,6 millóns de euros e un beneficio neto ao redor de 302 millóns de euros.
Imaxes relacionadas
