Román Rodríguez destaca a implicación de toda a comunidade educativa do CPI de Castroverde na atención á diversidade, a innovación e a igualdade
O conselleiro de Educación, acompañado polo delegado da Xunta en Lugo, coñece os proxectos deste centro, baseados no diálogo, a participación e a inclusión
Castroverde (Lugo), 29 de xaneiro de 2026
O conselleiro de Educación, Ciencia, Universidades e Formación Profesional, Román Rodríguez, puxo hoxe en valor os proxectos educativos que desenvolve o Colexio Público Integrado de Castroverde, un centro que destaca pola súa aposta pola innovación pedagóxica e pola atención á diversidade a través da implicación de toda a comunidade educativa.
Acompañado polo delegado territorial da Xunta en Lugo, Javier Arias, o conselleiro salientou que o centro leva máis dunha década traballando cun modelo educativo baseado no diálogo, a participación activa das familias e do contorno e a promoción da igualdade de oportunidades para todo o alumnado.
Entre as iniciativas que coñeceu destacan as tertulias na ESO, os grupos interactivos en Educación Primaria coa participación de profesorado e voluntariado, así como os programas de apadriñamento lector e científico. Román Rodríguez sinalou que proxectos “coma estes son un exemplo do gran ensino no rural galego”, e remarcou que Galicia “é hoxe a comunidade autónoma co sistema educativo máis próximo á cidadanía, cun centro de Infantil e Primaria en máis do 90% dos concellos, fronte ao 55% da media estatal”.
No eido da atención á diversidade, o conselleiro destacou a aposta do CPI de Castroverde pola docencia compartida, cunha presenza continua de profesorado de apoio dentro das aulas, en liña co compromiso da Xunta de Galicia.
Imaxes relacionadas
