Santiago de Compostela, 29 xaneiro de 2026

A Xunta e o Concello de Lobios avanzan no seu traballo conxunto en favor do medio rural deste municipio, en particular no que se refire á prevención, defensa e extinción de incendios forestais. Sobre estes asuntos tratou a xuntanza de traballo mantida esta tarde en San Caetano entre a conselleira do Medio Rural, María José Gómez, e a alcaldesa de Lobios, María del Carmen Yáñez, na que tamén paticipou o director xeral de Defensa do Monte, Manuel Francisco.

No encontro púxose en valor o labor realizado ao abeiro do convenio para o establecemento e consolidación dun sistema público de xestión da biomasa nas faixas secundarias. O concello conta, ademais, co seu plan municipal de prevención e defensa contra incendios forestais, aprobado no 2020, e ten catro parroquias priorizadas dentro deste convenio.

Así mesmo, a reunión serviu tamén para avaliar os investimentos realizados pola Consellería en diferentes conceptos relacionados coa loita contra o lume no termo municipal. Así, desde o ano 2020 Medio Rural achegou máis de 480.000 euros para tratamentos preventivos; infraestruturas, como pistas, devasas, puntos de vixilancia ou puntos de auga; e para financiar, vía convenio, a constitución e actuación de brigadas municipais.