A Coruña, 6 de febreiro de 2026

A delegada territorial da Xunta na Coruña, Belén do Campo, xunto coa delegada territorial en Ferrol, Martina Aneiros, mantiveron unha reunión de traballo na que tamén participaron a nova directora xeral de Planificación e Ordenación Forestal, Luisa Piñeiro Arcos e o novo director xeral de Defensa do Monte, Manuel Francisco Gutiérrez. Ademais estiveron presentes o xefe de servizo de Montes, Javier Márquez e o xefe de servizo de Prevención de Incendios Forestais, Guillermo Acebal, así como os xefes dos Distritos Forestais.

Durante o encontro analizouse o número de concellos adheridos ao actual convenio que a Consellería do Medio Rural ten con Seaga para a xestión da biomasa nas faixas secundarias en aras de seguir aumentando o número de municipios.

Na reunión tamén se revisaron as diferentes ordes de axudas que a Xunta de Galicia ten previsto convocar proximamente, dirixidas a apoiar ás entidades locais e a outros beneficiarios nas actuacións de prevención, xestión da biomasa e ordenación forestal.

Así mesmo, abordáronse distintas medidas de coordinación entre as delegacións territoriais, os servizos forestais e de incendios e os distritos, co obxectivo de seguir mellorando a planificación e a eficacia dos traballos previos ao inicio do período de alto risco de lumes.

A delegada territorial da Xunta na Coruña puxo en valor a importancia da colaboración institucional e do traballo conxunto dos equipos técnicos para anticiparse aos riscos, optimizar recursos e reforzar a protección do monte galego.