Boimorto (A Coruña), 10 de febreiro de 2026

A delegada da Xunta, Belén do Campo, xunto coa alcaldesa de Boimorto, María Jesús Novo, desprazouse ata a explotación Casa Menor 1614, que ten unha produción de 1 millón de litros ao ano e conta con máis de 90 cabezas de gando vacún, para coñecer de primeira man o seu funcionamento e recoñecer o seu labor tras acadar o ouro na categoría de gandería extensiva grande nos IX Premios á Excelencia Hixiénico-Sanitaria das Explotacións Leiteiras de Leite Cru de Vaca 2025 (Os Premios Exceleite).

Estes galardóns teñen como obxectivo recoñecer e poñer en valor o esforzo das ganderías galegas que destacan pola calidade hixiénico-sanitaria do leite producido, polo cumprimento rigoroso das normas de seguridade alimentaria e polo compromiso coa mellora continua dos seus procesos produtivos. Belén do Campo subliñou que “estes recoñecementos buscan incentivar as boas prácticas no manexo do gando, na sanidade animal e na calidade do leite, contribuíndo así a reforzar a competitividade do sector lácteo galego, a confianza das persoas consumidoras e a proxección dunha imaxe de excelencia do rural de Galicia”.

Durante a visita, Belén do Campo puxo esta explotación como exemplo dun modelo produtivo sólido, sostible e con proxección de futuro, destacando a capacidade de adaptación e mellora continua dunha gandería que soubo medrar mantendo elevados niveis de calidade, sanidade e benestar animal. Segundo indicou, trátase dun claro reflexo da evolución positiva que está a vivir o sector lácteo galego.

A delegada incidiu no peso estratéxico do leite dentro da economía e da cohesión social do rural galego. “A excelencia do sector primario é unha das señas de identidade de Galicia, e esa reputación constrúese día a día co esforzo dos gandeiros e gandeiras”, afirmou, ao tempo que puxo en valor o recoñecemento acadado por Casa Menor 1614 como mostra dese bo facer.

Así mesmo, subliñou que o conxunto de actividades vinculadas á produción láctea —desde as explotacións ata a industria e a loxística— constitúe unha cadea de valor fundamental para o territorio, que conta co respaldo da Xunta para asegurar a súa continuidade e competitividade.

Belén do Campo lembrou que Galicia reforzou a súa posición como unha das principais rexións produtoras de leite a nivel europeo, un avance que se explica pola profesionalización do sector, a modernización das granxas e a aposta por modelos máis eficientes. “A produción segue medrando grazas a explotacións cada vez máis preparadas e con maior capacidade técnica”, sinalou.

Neste contexto, apuntou a delegada, “a explotación Casa Menor 1614 representa o tipo de gandería que promove o Goberno galego: moderna, responsable e orientada á calidade, mesmo en sistemas extensivos de gran dimensión, nos que a xestión e o control sanitario resultan determinantes”.

Compromiso da Xunta coa renovación e a sustentabilidade do rural

A pesar da boa situación actual, con prezos estables e unha elevada capacidade de transformación dentro da comunidade, a delegada recoñeceu que o sector debe seguir avanzando en ámbitos clave como a renovación das explotacións e a incorporación de novas xeracións ao agro.

Neste sentido, destacou o esforzo orzamentario previsto para 2026, cun investimento de arredor de 24 millóns de euros destinado a facilitar a entrada de mozos e mozas no sector agrario, así como o reforzo do programa de titorización e asesoramento. A isto súmanse 19,6 millóns de euros para apoiar o labor transformador da industria agroalimentaria. Así mesmo, manterase o esforzo a través do Plan Leader, unha medida que acadará no 2026 os 15,5 millóns de euros.

Do mesmo xeito, a Xunta continuará a ofrecer ferramentas que favorezan a continuidade da actividade, como o Banco de Explotacións, pensado para conectar gandeiros que cesan coa actividade con persoas interesadas en asumila, ademais das actuacións en sanidade animal encamiñadas a preservar o excelente nivel sanitario da cabana gandeira galega.

A delegada concluíu sinalando que exemplos como o de Casa Menor 1614 “amosan que o rural galego ten futuro cando conflúen profesionalidade, innovación e acompañamento institucional”.