Santiago de Compostela, 11 de febreiro do 2026

A conselleira do Mar, Marta Villaverde, mantivo hoxe unha reunión coas confrarías afectadas pola proposta do Ministerio para a Transición Ecolóxica e o Reto Demográfico (MITECO) para incluír a anguía no listado de especies en perigo de extinción, unha decisión que implicaría a prohibición da súa pesqueira.

A titular de Mar explicou que foi a propia Xunta quen trasladou ao sector a convocatoria da Comisión estatal de Flora e Fauna na que se abordará esta cuestión, iniciando así unha rolda de contactos coas entidades máis representativas da actividade en Galicia. Neste sentido, lembrou que na comunidade existen tres plans de explotación específicos —nas rías de Vigo, Arousa e Ferrol— que afectan directamente a confrarías como as de Arcade, Carril e Ferrol, nas que hai embarcacións que dependen en exclusiva desta pesqueira.

Villaverde subliñou que o sector realizou nos últimos anos un importante esforzo de adaptación ás esixencias normativas, con medidas cada vez máis restritivas que inclúen ampliación dos períodos de veda, limitación dos días de actividade e establecemento de cotas de captura. Segundo explicou, o control e monitorización da actividade demostran que o recurso está a ser xestionado en Galicia de maneira responsable e sustentable.

A titular de Mar advertiu ademais de que a proposta estatal implicaría unha prohibición circunscrita a España mentres outros países da Unión Europea poderían continuar explotando este recurso, o que xeraría unha situación de clara desvantaxe competitiva para o sector galego.

Neste contexto, a responsable autonómica incidiu en que a sustentabilidade debe abordarse desde unha visión integral que teña en conta non só a dimensión ambiental senón tamén a social e económica, especialmente en territorios costeiros onde esta actividade constitúe unha fonte de emprego e fixación de poboación.

Villaverde tamén lamentou que a iniciativa estatal se retome sen novos informes técnicos que a avalen e recordou que propostas semellantes xa foron rexeitadas anteriormente polo conxunto das comunidades autónomas. Neste sentido, criticou a falta de diálogo institucional e advertiu de que a adopción de medidas de xestión pesqueira desde ámbitos alleos ao sector pode provocar decisións afastadas da realidade produtiva.

Alegacións fundamentadas

A Consellería do Mar presentou alegacións formais á proposta do MITECO, nas que solicita a retirada da declaración de especie en perigo de extinción e reclama que calquera decisión se basee en informes científicos actualizados, nunha análise diferenciada por territorios e nun proceso real de diálogo coas comunidades autónomas e co propio sector.

Nas alegacións remitidas ao Ministerio, a Xunta defende que Galicia vén aplicando medidas de conservación e control que garanten unha explotación responsable da anguía, con seguimento científico continuo e limitacións ao esforzo pesqueiro. Ademais, advírtese de que unha prohibición total sen avaliación territorializada podería provocar un grave impacto socioeconómico e mesmo favorecer a pesca ilegal, polo que se aposta por reforzar os mecanismos de xestión e control existentes en lugar de eliminar a actividade de forma xeneralizada.