Lugo, 19 de febreiro de 2026

A directora xeral de FP, Eugenia Pérez, visitou esta mañá o Centro Integrado de FP Politécnico de Lugo para coñecer o novo torno de control numérico con eixo Y que dá servizo aos ciclos da familia profesional de Fabricación mecánica. Tal e como explicou, esta ferramenta está incluída nun investimento de 3,4 M€ que a Xunta está a facer este curso no equipamento especializado dos centros de FP.

“Este equipamento favorece que o alumnado traballe con tecnoloxía industrial de última xeración, facilitando a aprendizaxe de interfaces actuais, simulación 3D e programación CNC avanzada en condicións equivalentes ás dunha empresa”, explicou a representante da Consellería de Educación, Ciencia, Universidades e FP. “Isto permítenos formar os estudantes nas esixencias da industria e supón un salto cualitativo ao preparalos para o paso ao mercado laboral”, destacou

 Trátase dunha máquina de altas prestacións, deseñada para a fabricación de pezas complexas mediante procesos integrados de torneado e fresado nun só amarre, tal e como se realiza nas contornas produtivas reais. Isto supón que a nova máquina pode fabricar pezas que normalmente requirirían pasar primeiro por un torno e despois por unha fresadora. Deste xeito, redúcese o tempo de traballo e increméntase a precisión, ao non ter que mover a peza entre distintas máquinas.

 O torno incorpora o eixo Y (e non só eixes X e Z, os que teñen os tornos convencionais), o que permite desprazar a ferramenta cara arriba e abaixo, facendo posible mecanizados máis complexos sen sacar a peza da máquina. Conta tamén con ferramentas motorizadas e sistemas automáticos de medición e verificación, o que favorece unha formación práctica baseada na precisión, na eficiencia e na optimización dos procesos.

 Aula de comercio

A directora xeral visitou tamén o CIFP As Mercedes para coñecer o novo espazo de tecnoloxía aplicada Retail Lab 4.0: Innovación e tecnoloxía para o comercio do futuro, empregado polo alumnado dos ciclos da familia profesional de Comercio e márketing.

 O novo esPazo simula un comercio real no que o alumnado pode desenvolver habilidades prácticas en escaparatismo, visual merchandising, xestión de produtos, estratexias de venda e comercio dixital. Conta con todo tipo de material para que os estudantes se familiaricen con tecnoloxías como sensores para recollida e análise de datos e creación de mapas de calor; técnicas de neuromarketing, pantallas interactivas, realidade aumentada e un sistema real de xestión de stock conectado cunha tenda en liña para simular transaccións comerciais reais.

Deste xeito, fortalécese a conexión co sector empresarial e modernízase a formación do alumnado, incorporando tecnoloxía avanzada para a análise do comportamento do consumidor, así como a posibilidade de mellorar a presentación e xestión de produtos.

A aula forma parte da rede de 115 espazos de tecnoloxía aplicada en centros de FP galegos este curso, cun investimento total da Xunta de 6,3 M€ nos últimos catro anos.