Ordes (A Coruña), 26 de febreiro de 2026

O director xeral de Centros e Recursos Humanos, Jesús Álvarez, recibiu hoxe un grupo de profesores do CEIP República del Paraguay de Madrid na súa visita ao Colexio de Campomaior (Ordes) para coñecer o funcionamento do sistema educativo galego. Fano a través do programa Observa_Acción, que promove o desenvolvemento das competencias docentes mediante a observación de prácticas educativas e o intercambio de experiencias. 

Durante a súa estadía de dúas xornadas no centro os docentes visitantes observarán o traballo diario nas aulas do centro ordense. Ademais, terán a oportunidade de afondar no observado da man dos mestres do CEIP de Campomaior, creando así redes de aprendizaxe profesional. Á súa vez, os profesores galegos poderán viaxar a Madrid para realizar a súa experiencia neste programa do 4 ao 6 de marzo.

Observa_Acción desenvólvese en dúas fases: unha primeira no propio centro e con outros centros galegos e, no segundo ano de participación no programa, con centros educativos doutras comunidades e de países socios a nivel internacional. A iniciativa forma parte de Galemundo, o programa de internacionalización do ensino da Xunta que permite que máis de 8.300 alumnos e docentes realicen estadías en diferentes países este curso co apoio do Goberno galego.