Vigo, 26 de febreiro de 2026

A directora xeral de Traballo Autónomo e Economía Social, Marta Mariño, asistiu hoxe á Asemblea Xeral de Empresarias Galicia, onde destacou o papel primordial da entidade á hora de impulsar o emprendemento e o traballo por conta propia a cargo das mulleres. Nese senso, Mariño chamounas a seguir polo mesmo camiño da man da Xunta, no marco da futura Estratexia de emprendemento ligado ao territorio de Galicia —actualmente en período de consultas con todo o sector— e orientada a fixar actividade económica no rural e a favorecer o equilibrio territorial e a remuda, abranguendo todo o ciclo emprendedor. 

A directora xeral aproveitou o acto para poñer en valor ferramentas autonómicas como a Rede de polos de emprendemento e apoio ao emprego, con 15 centros repartidos por toda Galicia, que ten atendido máis de 5.600 proxectos no conxunto da Comunidade. Engadiu que un 57 % das persoas emprendedoras que se achegan aos Polos son mulleres, fronte ao 43 % de homes.