Pontevedra, 27 de febreiro de 2026

O conselleiro de Sanidade, Antonio Gómez Caamaño, avanzou hoxe que o seu departamento porá en marcha este ano un servizo pioneiro de rehabilitación domiciliaria para pacientes pediátricos no marco da Estratexia galega en enfermidades raras.

O titular da carteira sanitaria da Xunta, acompañado do delegado territorial da Xunta en Pontevedra, Agustín Reguera, e do xerente da área sanitaria de Pontevedra e O Salnés, José Flores, interveu esta mañá na inauguración da xornada organizada con motivo do Día Mundial das Enfermidades Raras 2026, que se conmemora mañá, día 28 de febreiro. O encontro, que se desenvolveu no Hospital público de Montecelo co lema Porque cada persoa importa, foi organizado pola Federación galega de enfermidades raras e crónicas (Fegerec).

O conselleiro explicou que a Consellería de Sanidade desenvolverá a nova prestación de rehabilitación domiciliaria en colaboración con Fegerec e contará con rehabilitadores, traballadores sociais e profesionais da xestión asistencial. Na actualidade xa se ten definido o modelo e o proceso asistencial.

Na súa intervención no acto, Gómez Caamaño sinalou que as unidades funcionais multidisciplinarias para atender pacientes con enfermidades raras, que comezaron a funcionar en 2021 nos hospitais da Coruña, Santiago de Compostela e Vigo, xa realizaron máis de 8.800 consultas.

Nova Estratexia en enfermidades raras

A Xunta deu o pasado mes de xullo un forte impulso á atención a estes pacientes coa aprobación da nova Estratexia galega en enfermidades raras para os vindeiros cinco anos, con preto de 400 millóns de euros de investimento e o obxecto de mellorar a abordaxe, a atención e os tratamentos a estes doentes.

O conselleiro sinalou que, a finais do pasado ano, había preto de 5.700 pacientes inscritos no Rexistro galego de enfermidades raras, con 482 patoloxías diferentes.

A intención de Sanidade tamén é reforzar a prevención secundaria e, para manter a posición de liderado, a Xunta ampliará con 12 novas patoloxías o cribado neonatal. Na actualidade, xa se detectan, de xeito precoz, 37 metabolopatías. En concreto, entre o ano 2000 e o 2024, foron cribados máis de 476.500 bebés, chegando a diagnosticar 705 enfermidades.

O titular de Sanidade puxo en valor o traballo dos tres institutos de investigación sanitaria e da Fundación galega de Medicina Xenómica, no propósito de optimizar os recursos para reducir os tempos de espera das probas e os estudos xenéticos de diagnóstico.

Xunto ao anterior, a Xunta está a incorporar tecnoloxía robótica aos servizos de rehabilitación hospitalaria das sete áreas e destinará 384 millóns a financiar terapias farmacolóxicas, asegurando a cobertura pública. Terapias que xa beneficiaron a 4.000 persoas.

Para rematar a súa intervención, o conselleiro incidiu na importancia de traballar co tecido asociativo para lograr un maior acompañamento ás familias dos pacientes con enfermidades raras.