Santiago de Compostela, 3 de marzo de 2026

O seguimento da folga de facultativos de atención primaria convocada pola organización sindical O’Mega na quenda de mañá deste martes foi do 6,05 % nos centros sanitarios da comunidade galega.

Por áreas sanitarias, o seguimento na área sanitaria da Coruña e Cee foi do 6,47 %; na de Ferrol, 7,81 %; na de Santiago de Compostela e Barbanza, 6,92 %; na de Lugo, A Mariña e Monforte de Lemos, 1,79 %; na de Ourense, Verín e O Barco de Valdeorras, 1,78 %; na de Pontevedra e O Salnés, 4,85 %; e na de Vigo, 10,47 %.

O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.

Como consecuencia da folga de facultativos de atención primaria convocada pola organización sindical O’Mega na xornada deste luns, 2 de marzo, foron suspendidas no conxunto de Galicia 5.519 consultas de atención primaria.

A Consellería de Sanidade insta a O'Mega a sumarse ao acordo maioritario sobre atención primaria para evitarlles a pacientes e profesionais os efectos dun paro indefinido.

A Consellería de Sanidade realizou o pasado venres un grande esforzo negociador co sindicato convocante da folga indefinida en atención primaria co obxectivo de chegar á desconvocatoria do paro.

A postura adoptada polo sindicato convocante, que rexeitou a desconvocatoria cautelar da folga, impediu chegar a un acordo para evitar un paro prexudicial para os pacientes e os profesionais da sanidade pública.