Valencia, 6 de marzo de 2026

A conselleira de Medio Ambiente e Cambio Climático, Ángeles Vázquez, ofreceu hoxe a Lei de ordenación e xestión integrada do litoral de Galicia (Loxilga) como marco de referencia para o deseño da futura normativa estatal de Costas.

Durante a súa intervención no II Cumio nacional do litoral, que se celebrou hoxe en Valencia, e no que participaron representantes de sete comunidades costeiras -Galicia, Comunidade Valenciana, Murcia, Andalucía, Cantabria, Baleares e Canarias-, Ángeles Vázquez defendeu a necesidade de reformar a actual Lei de Costas de cara a clarificar competencias, reforzar a seguridade xurídica e consolidar un modelo de xestión integral.

Nesa liña, insistiu en que a nova normativa deberá incorporar a tripla perspectiva ambiental, social e económica -tal e como fai a lei galega-, afrontar con realismo a adaptación ao cambio climático e establecer criterios técnicos respectuosos coa diversidade territorial.

De feito, a conselleira fixo fincapé en que esa reforma se leve a cabo con transparencia e, sobre todo, de forma coordinada entre o Goberno central e as comunidades autónomas. “Precisamos normas claras, estables e consensuadas e iso só pode lograrse mediante unha reforma legal de amplo alcance e un verdadeiro traballo conxunto entre administracións”, subliñou.

Nese senso, lamentou o intento do Goberno central de reformar “pola porta de atrás” esta normativa a través dunha modificación do seu regulamento “sen  ningunha reunión, aviso ou notificación previa ás comunidades”. Ademais, criticou que o Executivo central apelase a un expediente de infracción aberto pola Comisión Europea nesta materia como xustificación para acometer esta reforma.

Ditame motivado sobre o expediente de infracción

En concreto, Ángeles Vázquez explicou que o que lle pide a Unión Europea a España é modificar certos aspectos da Lei de Costas, advertindo de que unha reforma regulamentaria non sería suficiente. Ademais, nese ditame motivado o propio Executivo central recoñece ante as autoridades comunitarias a dificultade para aprobar unha norma con rango de lei pola falta da maioría parlamentaria necesaria.

A conselleira amosou o malestar por ter recibido ese ditame máis dun ano despois de que fose enviado ao Goberno central -Bruxelas emitiuno en decembro de 2024 e o Executivo central trasladouno a pasada semana- e logo de que durante todo este tempo se lle negase ás comunidades autónomas o acceso ao mesmo.

A maiores, tamén a través dese ditame, as comunidades coñeceron que o Ministerio para a Transición Ecolóxica e o Reto Demográfico presenta ante Bruxelas por iniciativa propia unha serie de cuestións, como a aplicabilidade da Directiva de servizos ás actividades produtivas, ou a aplicación de criterios máis restritivos no relativo ás concesións na costa. En concreto, plantea a posibilidade de denegar prórrogas ou paralizalas ata a aprobación do novo regulamento nos termos propostos.

Manifesto conxunto

“Protexer non significa xestionar desde a unilateralidade, nin aplicar criterios homoxéneos, restritivos e arbitrarios que non teñan en conta a diversidade territorial, social e económica da costa española”, dixo Ángeles Vázquez, que engadiu que “Galicia non defende nin a especulación nin a degradación, senón que aposta por unha xestión integral, equilibrada e responsable do litoral”.

Así, a Xunta reivindica un modelo de cogobernanza real no que as comunidades participen activamente na definición dos criterios técnicos dos deslindes, na planificación da adaptación climática e na xestión do dominio público marítimo-terrestre. Neste sentido, a conselleira puxo en valor a posta en marcha dun grupo de traballo entre as comunidades costeiras para deseñar con rigor e de xeito coordinado unha nova Lei de Costas que garanta a protección efectiva e o desenvolvemento sostible do litoral.

De feito, as comunidades participantes neste segundo Cumio nacional do litoral -o primeiro celebrouse o pasado mes de novembro en Baiona-, pactaron un manifesto que esixe unha nova Lei de Costas, rexeitar os regulamentos que impulsa o Goberno central e solicita unha reunión urxente da conferencia sectorial á que asista a ministra para a Transición Ecolóxica e o Reto Demográfico, Sara Aagesen.

Galicia, exemplo de xestión

Durante a súa intervención, a conselleira salientou que desde que a Xunta asumiu a xestión do seu litoral logo do traspaso de funcións e servizos o pasado 1 de xullo, “a costa galega está moito mellor xestionada” con iniciativas como o rexistro de autorizacións e concesións, o decreto de procedemento integrado ou a solicitude única -fronte á disparidade de criterios entre provincias en canto á duración ou taxas a aboar que había antes-.

Ademais, o Goberno galego traballa tamén na posta en valor do patrimonio costeiro con medidas como o deseño do Camiño do litoral, o Catálogo de bens de valor cultural que posibilitará dar novas utilidades a edificacións en desuso, ou a promoción de chiringuitos biosostibles.

Para concluír, a conselleira subliñou que Galicia “está demostrando que é posible xestionar mellor desde a proximidade, con coñecemento técnico, rigor ambiental e sensibilidade social”.