Santiago de Compostela, 17 de marzo de 2026

O director da Axencia Galega da Calidade Alimentaria, Martín Alemparte, mantivo unha reunión con representantes da Fundación Juana de Vega para afondar na súa colaboración a prol da recuperación da oliveira en Galicia. A Axencia, dependente da Consellería do Medio Rural, está a cooperar co Grupo Operativo Oliveiras de Galicia, que ten o obxectivo de optimizar técnicas de estaca clásica e micropropagación in vitro para a multiplicación a grande escala de 11 variedades únicas de oliveiras.

Neste sentido, desde o Goberno galego estase a traballar tamén para favorecer o desenvolvemento das variedades autóctonas de oliveira en Galicia e este mesmo ano iniciarase a produción de plantas certificadas como variedades autóctonas na Estación Experimental Agrícola de Baixo Miño, en Salceda de Caselas, para que os produtores poidan dispoñer delas e seguir estudándoas. En concreto, empregaranse catro destas variedades, das cales hai unha que xa está identificada xeneticamente como única en Galicia polo Banco Mundial de Xermoplasma.