Santiago de Compostela, 27 de marzo de 2026

O Diario Oficial de Galicia publica hoxe a orde pola que se recoñecen as persoas deportistas de alto nivel, alto rendemento, rendemento deportivo de base e vitalicias; e as persoas adestradoras ou técnicas, xuízas e árbitras recoñecidas de alto nivel. Trátase de 136 incorporacións, co que o número total de deportistas recoñecidos segue batendo récords e chega xa a 1.849, con 780 mulleres (42%) e 1.069 homes (58%).

Destaca o recoñecemento vitalicio de Rodrigo Corrales, actual xogador de balonmán que foi podio nos Xogos Olímpicos de París en 2024 e nos de Tokio en 2021, entre outros logros. Como novos deportistas de alto nivel, figuran, entre outros, o taekwondista Tomás Fernández, podio no Europeo na modalidade de poomsae; a atleta Sandra González, podio no Europeo de cross, e o piragüista Javier Cid, polo cuarto posto no mundial júnior na proba 500m en C4. Como técnicos de alto nivel, entre outros, van recoñecidos por paratríatlon Luis Alberto Piña e por piragüismo Manuel Pedrares.

Arredor do 78% dos recoñecidos -1.425- son deportistas galegos de alto nivel (592 mulleres e 833 homes). Ademais, hai 170 deportistas de rendemento deportivo de base (90 mulleres e 80 homes); 164 deportistas de alto rendemento (70 mulleres e 92 homes); 48 técnicos de alto nivel (cinco mulleres e 43 homes); 28 persoas árbitras e xuízas (16 mulleres e 12 homes); e 14 deportistas galegos de alto nivel vitalicios (cinco mulleres e nove homes). Cómpre salientar, asemade, que entre todas as categorías están recoñecidos 58 deportistas galegos (19 mulleres e 39 homes) con diversidade funcional, o número máis alto da historia e que segue a medrar.

Estas cifras acadadas polo deporte de alto nivel de Galicia débense, por unha banda, ao traballo e ao incremento de nivel dos deportistas de Galicia nos últimos anos. A isto engádese o decreto de alto nivel publicado en setembro de 2020 que, ademais do deporte de alto nivel de Galicia, tamén recoñece o alto rendemento deportivo -práctica deportiva que aínda non pode ser cualificada de alto nivel pero cuxa proxección indica que estará en condicións de selo- e o rendemento deportivo de base -etapa de desenvolvemento e perfeccionamento previa a acadar o alto rendemento deportivo ou o alto nivel-.

O mesmo ocorre coas categorías de técnicos-adestradores e xuíces-árbitros, novos colectivos que se incorporan á figura do alto nivel, a través da Comisión Galega de Avaliación do Alto Nivel Deportivo.

Axudas ao alto nivel

Cómpre salientar que en xaneiro a Fundación Deporte Galego resolveu as axudas DGAN – TAXAGAN para deportistas galegos de alto nivel, así como técnicos, adestradores, xuíces e árbitros de alto nivel 2025, cun récord histórico en formato dunha única convocatoria tanto en número de axudas, con 595, como en importe, con máis de 840.000 euros. O ano anterior acadárase o récord de preto dun millón de euros en axudas DGAN, pero con dúas convocatorias: a ordinaria e a correspondente aos Xogos Olímpicos e Paralímpicos de París.