Bergondo (A Coruña), 7 de abril de 2026

A delegada da Xunta, Belén do Campo, acompañada pola directora territorial da Consellería de Medio Ambiente e Cambio Climático, Pilar Arias, participou nun encontro de traballo cos representantes do Club de Remo Olímpico Mandeo, na que participaron a súa presidenta, María del Carmen Mesía, e o secretario e adestrador, Manuel Landeira.

Durante o encontro, os responsables do club trasladaron á delegada distintas necesidades vinculadas ao desenvolvemento da súa actividade deportiva. Neste sentido, Belén do Campo comprometeuse a estudar as diferentes propostas da entidade para a implantación dunha instalación para dar servizo aos deportistas que adestran na contorna da ría de Betanzos.

A representante do Goberno autonómico aproveitou para poñer en valor a traxectoria do Club de Remo Olímpico Mandeo, destacando o seu crecemento e consolidación no ámbito do remo a nivel estatal. “O Club de Remo Olímpico do Mandeo leva unha década convertendo a ría de Betanzos nunha escola de remo e de valores, cunha traxectoria destacada desde os seus inicios”, sinalou.

A primeira medalla nun Campionato de España chegou xa en 2016, apenas un ano despois da creación do club. Desde entón, a entidade foi gañando presenza no panorama nacional, acadando en 2019 un dos fitos máis destacados da súa historia, coa obtención de oito medallas no Campionato de España, cinco delas de ouro. No balance global da súa traxectoria, o club suma xa máis de 20 medallas nacionais e logrou que seis dos seus deportistas fosen convocados coa selección española.

Na actualidade, o Club de Remo Olímpico Mandeo conta con preto de 60 socios e dispón dun importante equipamento deportivo valorado en máis de 200.000 euros, entre o que se inclúen unha vintena de embarcacións.

Finalmente, a delegada lembrou que a Xunta de Galicia apoia o labor deste tipo de entidades a través das liñas de axudas da Consellería de Presidencia, Xustiza e Deportes, destinadas ao fomento e desenvolvemento das actividades deportivas en Galicia.