Santiago de Compostela, 22 de abril de 2026

A Xunta, a través da Consellería de Sanidade, publica hoxe no Portal de Contratos de Galicia a licitación, por un importe de 775.111 euros, do subministro e instalación da infraestrutura tecnolóxica para a posta en marcha do Centro de Procesamento de Datos (CPD) do Hospital Público Novo Montecelo de Pontevedra.

O contrato ten como obxectivo dotar o hospital pontevedrés dun equipamento de vangarda baixo tres piares fundamentais: a eficiencia e optimización enerxética das instalacións,  o aumento da dispoñibilidade dos servizos TIC adaptada á demanda actual, e a estandarización e implementación de tecnoloxías emerxentes que acompañen a evolución dos sistemas de información.

Esta nova infraestrutura considérase esencial para o soporte das aplicacións corporativas, comunicacións e servizos dixitais do Servizo Galego de Saúde, orientándose a asegurar altos niveis de dispoñibilidade, seguridade e eficiencia enerxética.

Deste xeito, o Centro de Procesamento de Datos (CPD) do Novo Montecelo contará con áreas especializadas, incluíndo salas de servidores, de backup, salas LAN e WAN, alén dunha sala destinada aos sistemas de alimentación ininterrompida (SAI).

Entre o equipamento que inclúe o expediente destaca a instalación diversos armarios rack, así como o despregamento dunha robusta rede de cableado de cobre e fibra óptica, co que se garantirá a integración coa rede corporativa do Servizo Galego de Saúde.

As empresas interesadas en participar neste procedemento teñen ata o vindeiro 22 de maio para presentar as súas ofertas.

Unha vez adxudicado o contrato, o material deberá estar instalado e plenamente operativo nun prazo máximo de 6 meses, asegurando que todos os compoñentes sexan de última xeración e que conten cun soporte técnico estendido.