Silleda (Pontevedra), 25 de abril de 2026

O conselleiro de Sanidade, Antonio Gómez Caamaño, subliñou hoxe o esforzo da Xunta por consolidar o emprego na sanidade pública, celebrando en dúas fins de semana as probas de acceso para a acceder a 2.476 prazas no Servizo Galego de Saúde.

Xunto coa secretaria xeral técnica da Consellería de Sanidade, Natalia Lobato, e do director da Fundación Semana Verde de Galicia, Ricardo Durán, o titular de Sanidade supervisou esta mañá no Recinto Feiral Internacional de Silleda o desenvolvemento das probas de acceso ás especialidades de enfermería obstetrico-xinecolóxica e enfermería pediátrica. Ao longo da fin de semana celebraranse os exames doutras especialidades de enfermería e de  persoal de servizos xerais (PSX).

Segundo precisou Gómez Caamaño, para a realización das probas de enfermería obstétrica-xinecolóxica (matrón/a) estaban inscritas un total de 348 persoas, acudindo ao exame 293 aspirantes (participación 84,20%). O departamento sanitario da Xunta oferta 69 prazas nesta especialidade.

No que atinxe ás probas da fase de oposición da categoría de enfermería pediátrica, acudiron á realización do exame 181 dos 210 opositores admitidos (86,19 % de participación). Neste caso, o departamento sanitario público galego oferta un total de 60 prazas.

No seu conxunto, a quenda da mañá do sábado rexistrou unha participación do 84,95 %, ao realizar os exames de ambas as categorías 474 das 558 persoas convocadas.

O responsable da carteira sanitaria da Xunta agradeceu o traballo desenvolvido polo persoal do Servizo Galego de Saúde, as Forzas e Corpos de Seguridade, Protección Civil, a Autopista Central de Galicia (ACEGA), 061, Cruz Vermella e o persoal da Fundación Semana Verde de Galicia, que posibilitaron que as probas transcorreran, unha vez máis, con total normalidade.

Gómez Caamaño destacou que son preto de 400 as persoas implicadas nos labores de protección e vixilancia destas probas, lembrando o protocolo de vixilancia e antifraude co que conta o Servizo Galego de Saúde e que permite garantir a seguridade e a igualdade na realización dos exercicios.

Nesta liña, apuntou que nos procesos selectivos desta fin de semana, un total de 25 mulleres solicitaron o dereito á lactancia para poder interromper a realización da proba, no caso de ser preciso. Ademais, unha aspirante realizará esta tarde o seu exame desde o centro hospitalario no que se atopa ingresada por embarazo.

“O compromiso coa estabilidade dos profesionais da sanidade pública require dun grande esforzo económico, de xestión e de loxística” salientou o conselleiro, remarcando que, durante dúas fins de semana desta primavera se desenvolverán as probas para a acceder a preto de 2.500 prazas do Servizo Galego de Saúde.

Continúan os exames na quenda de tarde

O proceso selectivo para acceder ás prazas convocadas polo Servizo Galego de Saúde continuará esta tarde, cunha quenda vespertina á que están chamados un total de 870 opositores.

Desde as 16,00 horas terán lugar os exames para acceder a unha das 128 prazas que o Sergas convoca na categoría de enfermería familiar e comunitaria (838 admitidos) e para as 3 ofertadas na categoría de enfermería do traballo (32 admitidos).

Máis de 7.000 aspirantes convocados para o domingo

Durante a xornada de mañá domingo, e en quenda de tarde, desenvolveranse os exames para acceder ás 236 prazas ofertadas na categoría de Persoal de Servizos Xerais (PSX).

Un total de 7.056 aspirantes están chamados á realización dunhas probas das que, 10 prazas, estarán reservadas á quenda de discapacidade intelectual.

Ademais, o vindeiro 9 de maio o Recinto Feiral Internacional de Silleda acollerá a realización das probas para o acceso a categoría profesional de enfermería no sistema sanitario público galego. Un proceso no que están admitidos 8.661 persoas para acceder a 1.980 prazas.

ANEXO: PERSOAS ADMITIDAS POR CATEGORÍA E PRAZAS OFERTADAS