O seguimento na quenda de tarde da folga médica contra o Estatuto Marco do Goberno central acada o 1,46 % na sanidade pública galega
Nos servizos de atención hospitalaria o seguimento da folga é do 1,25 %
No que atinxe á atención primaria, o seguimento da folga en rexeitamento do borrador presentado polo Ministerio de Sanidade acada o 1,64 %
Santiago de Compostela, 27 de abril de 2026
O seguimento da folga de médicos a nivel nacional convocada contra o Estatuto Marco promovido polo Goberno central na quenda de tarde deste luns foi do 1,46 % nos centros sanitarios da comunidade galega.
A porcentaxe de participación nos sete grandes hospitais do Servizo Galego de Saúde, na quenda de tarde, acadou o 1,51 %. En canto aos hospitais comarcais, a folga non tivo seguimento na quenda de tarde. No seu conxunto, a actividade hospitalaria contou cunha participación na folga do 1,25 %.
No que atinxe á atención primaria, o seguimento da folga en rexeitamento do borrador presentado polo Ministerio de Sanidade acadou o 1,64 % de participación.
No total dos dous niveis asistencias a folga tivo un seguimento do 1,43 %.
Por centros hospitalarios, o paro foi secundado polo 1,39 % dos profesionais médicos do Hospital Universitario Lucus Augusti; polo 6,25 % no Complexo Hospitalario Universitario de Ourense e polo 1,37 % no Complexo Hospitalario Universitario de Pontevedra. Nos restantes centros hospitalarios a folga non foi secundada na quenda de tarde.
En canto ao seguimento en atención primaria durante a quenda de tarde, e por áreas sanitarias, foi o seguinte: na área sanitaria da Coruña e Cee, o 0,61 %; na área sanitaria de Santiago de Compostela e Barbanza, o 0,88 %; na área sanitaria de Ourense, Verín e O Barco de Valdeorras, o 1,52 %; na área sanitaria de Pontevedra e O Salnés, o 8,89 %; e na área sanitaria de Vigo, do 2,24 %. No caso das áreas sanitaria de Ferrol e da área sanitaria de Lugo, A Mariña e Monforte de Lemos, a folga non tivo seguimento nos seus centros de atención primaria.
Pola súa banda, en entidades sanitarias como son a Axencia Galega de Doazón de Sangue, Órganos e Tecidos (ADOS), a empresa pública de servizos sanitarios Galaria e a Fundación Pública Urxencias Sanitarias de Galicia-061, o seguimento na quenda de tarde acadou o 2,38%.
O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.
