San Cibrao das Viñas (Ourense), 28 de maio de 2026

O director da Axencia Galega da Calidade Alimentaria da Consellería do Medio Rural, Martín Alemparte, clausurou este mediodía a xornada Horizonte Agro 2026, innovación no territorio, que se desenvolveu no Centro Tecnolóxico da Carne (CTC) e que se centrou na presentación dos resultados provisionais de cinco grupos operativos para o desenvolvemento de novos produtos con base en materias primas galegas. En todos eles, o CTC (adscrito a Medio Rural) actuou como axente de innovación involucrado tecnicamente e integrado nos grupos operativos, como centro de coñecemento para desenvolver as súas iniciativas.

Os proxectos foron financiados cunha achega total de preto de 745.000 euros ao abeiro das axudas para a execución de proxectos innovadores dos grupos operativos da Asociación Europea da Innovación (AEI) en materia de produtividade e sustentabilidade agrícolas (EIP-Agri), do Plan Estratéxico da Política Agraria Común (PEPAC) 2023-2027. Estas subvencións, que xestiona a Axencia Galega da Calidade Alimentaria, están cofinanciadas polo Fondo Europeo Agrícola de Desenvolvemento Rural (Feader) nun 80 %, pola Xunta, nun 14 %, e polo Ministerio de Agricultura, Pesca e Alimentación nun 6 %.

Detalle dos proxectos

En particular, nesta xornada presentáronse os proxectos dos grupos operativos Gotrisa Europa, Sueroval, Bueyloñesa, Guiprogal e Ecoproveg. O primeiro deles, cun orzamento que superou lixeiramente os 160.000 euros, centrouse na posta en produción de trigo sarraceno ecolóxico e revalorización mediante produtos novidosos e sen glute.

A iniciativa de Sueroval, beneficiaria dunha axuda de máis de 179.000 euros, serviu para a revalorización do soro lácteo co fin de obter un ingrediente natural de alto valor e desenvolvemento de nova gama alimentaria. O proxecto de Bueyloñesa (175.800 euros) levou por título Utilización e valorización de cortes secundarios de canais de vacún maior.

Pola súa banda, o grupo operativo denominado Guiprogal centrou o seu proxecto na recuperación e valorización de variedades autóctonas de chícharo proteaxinoso para a sustentabilidade alimentaria. Contou cunha achega de case 140.000 euros. Por último, Ecoproveg recibiu algo máis de 90.000 euros para o desenvolvemento dunha liña de patés e láminas a partir de vexetais ecolóxicos.

Vantaxes da I+D+i aplicada

A xornada de hoxe, que tivo lugar na sede do CTC en San Cibrao das Viñas, foi unha oportunidade para descubrir como a I+D+i aplicada contribúe ao desenvolvemento de novos produtos, á diferenciación do sector primario e á posta en valor dos recursos do territorio.

Precisamente, a innovación e a transferencia de coñecementos ao sector constitúen dous dos piares básicos do traballo da Consellería do Medio Rural, co fin de mellorar a súa competitividade e rendibilidade. Nisto se centra gran parte do labor que desenvolve a Axencia Galega da Calidade Alimentaria, tal e como destacou neste acto o seu director, Martín Alemparte.