Santiago de Compostela, 3 de xuño de 2026

O conselleiro de Sanidade, Antonio Gómez Caamaño, lamentou hoxe no Parlamento a nova “chapuza” do Ministerio de Sanidade cunha reforma unilateral do copago farmacéutico que, pese a estar aprobada,  aínda non se pode aplicar plenamente porque o Ministerio non estableceu a poboación á que lle corresponde cada tramo. Denunciou, así mesmo, a falta de acordo coas comunidades autónomas sobre o financiamento desta reforma que custará 20 M€ ao ano a Galicia.

O titular de Sanidade  lamentou, no Pazo do Hórreo, que esta reforma con implicacións técnicas, económicas e organizativas tan importantes se leve a cabo sen o financiamento correspondente, sen consenso, sen planificación, sen respecto institucional e sen diálogo coas comunidades autónomas.

Tal e como detallou Gómez Caamaño, Galicia e o resto de comunidades estaban traballando, xunto co Ministerio de Sanidade, na Comisión Permanente de Farmacia para abordar unha reforma consensuada do sistema de copago e, nese foro, estábanse a buscar acordos entre todos para fixar, tanto o contido da reforma como o seu proceso de implantación.

Gómez Caamaño indicou que, sen previo aviso, o Goberno central decidiu modificar, mediante Real Decreto Lei, o sistema estatal de copago farmacéutico, desprezando o papel das comunidades, que son as que sosteñen e xestionan a asistencia sanitaria pública.

Tamén referiu que adoptar decisións unilaterais que acaban repercutindo directamente nas comunidades autónomas e nos pacientes é unha dinámica que se está a converter en habitual no Ministerio de Sanidade, unha deslealdade e falta de colaboración que lle está pasando factura á sanidade pública.

Gómez Caamaño referiuse ao desafío que representa a prestación farmacéutica ambulatoria para as comunidades autónomas. Ao respecto, sinalou que Galicia ten orzamentados para este ano preto de 1.000 millóns de euros para o gasto en receitas, por iso se amosou sorprendido de que  unha medida de tanto calado se leve a cabo sen acordar previamente a data da súa implantación nin o seu impacto económico.

Impacto das folgas

O proceder do Ministerio de Sanidade de anunciar medidas, aprobar normas ou presentar reformas sen contar coas comunidades autónomas é, para Gómez Caamaño, unha dinámica constante, como se está a ver nas reiteradas folgas contra o Estatuto Marco do Goberno central.

Ao respecto, o conselleiro dixo que, en cinco meses, esas mobilizacións levan cancelados 245.000 actos asistenciais en Galicia, claro exemplo de que as consecuencias deses paros as pagan os pacientes e as comunidades autónomas que xestionan a sanidade pública.

Gómez Caamaño incidiu en que Galicia seguirá a actuar con responsabilidade, a planificar con rigor e a defender os intereses dos pacientes galegos, garantindo que as decisións que afectan á sanidade pública se adopten con seriedade, con previsión e pensando sempre na cidadanía.