Santiago de Compostela, 19 de xuño de 2026

O conselleiro de Educación, Ciencia, Universidades e FP, Román Rodríguez, felicitou aos alumnos que obtiveron os mellores resultados na Proba de Acceso á Universidade (PAU) 2026. Fíxoo no decurso dun acto de recoñecemento aos mellores expedientes desta proba na que tamén participaron os reitores da Universidade de Santiago de Compostela, Rosa Crujeiras; Vigo, Manuel Reigosa, e A Coruña, Ricardo Cao. En total, recibiron este recoñecemento 1.120 estudantes procedentes de 225 centros educativos de toda Galicia.

O titular de Educación do Goberno galego asegurou que estes excelentes resultados son froito “do esforzo persoal e o traballo constante” de cada un dos alumnos que, ademais, representan “a Galicia Calidade de presente e de futuro”. E animounos a todos a continuar o camiño da excelencia académica na súa futura etapa universitaria.

Cómpre salientar que esta é a terceira promoción de estudantes que se vai beneficiar da matrícula universitaria de balde, unha medida pioneira da Xunta de Galicia que reforza a igualdade de oportunidades que ofrece o sistema educativo galego cun ensino gratuíto desde a etapa de infantil ata a universidade.