Vilamartín de Valdeorras (Ourense), 20 de xuño de 2026

O director da Axencia Galega da Calidade Alimentaria, Martín Alemparte, participou hoxe na entrega de premios da XXVII Cata dos Viños de Valdeorras, onde puxo en valor o papel da calidade diferenciada como ferramenta para crear valor engadido, fortalecer o sector agroalimentario e contribuír ao desenvolvemento do rural galego.

Durante a súa intervención, destacou a importancia da Denominación de Orixe Valdeorras, unha das cinco denominacións de orixe vitivinícolas de Galicia, como exemplo da aposta pola autenticidade, a diferenciación e a vinculación co territorio que caracterizan aos viños galegos.

Neste sentido, salientou que a singularidade das variedades autóctonas constitúe unha das principais fortalezas do sector vitivinícola galego. Así, fixo referencia ao papel desempeñado polo godello e a mencía, variedades estreitamente ligadas á identidade de Valdeorras e que contribuíron decisivamente ao recoñecemento dos seus viños nos mercados nacionais e internacionais.

Alemparte sinalou que Galicia conta cun patrimonio vitivinícola único, construído ao longo de xeracións grazas ao traballo de viticultores e adegas que souberon conservar e poñer en valor as variedades propias e as características singulares de cada territorio produtor.

O director destacou tamén a contribución do sector vitivinícola á xeración de emprego, á actividade económica e á fixación de poboación nas contornas rurais, ao tempo que favorece á conservación da paisaxe, do patrimonio e do coñecemento asociado ao cultivo da vide. Neste contexto, lembrou que o viño representa máis da metade do valor económico da produción agroalimentaria galega amparada por figuras de calidade diferenciada, consolidándose como un dos sectores estratéxicos para o desenvolvemento do medio rural galego.