O presidente da Xunta participou no acto de entrega dos Títulos de Excelencia Galega 2026, organizado pola Asociación de Empresarios Galegos de Cataluña
Rueda agradece a achega dos empresarios do exterior a unha Galicia cada vez máis moderna e competitiva
Destaca que os seis premiados na gala desta noite representan a Galicia Calidade
Pon en valor o galeguismo aberto e integrador, e reivindica que a comunidade non aceptará ningún trato discriminatorio con respecto a outros territorios
Barcelona, 3 de xullo de 2026
O presidente da Xunta, Alfonso Rueda, agradeceu hoxe a achega dos empresarios do exterior, e do conxunto dos galegos, para construír unha comunidade autónoma cada vez máis moderna e competitiva. Así o sinalou esta noite durante a súa participación no acto de entrega dos Títulos de Excelencia Galega 2026, un acto organizado pola Asociación de Empresarios Galegos de Cataluña (Aega-Cat).
No acto recoñeceuse ao prestixioso traumatólogo Manuel Leyes; á escritora Espido Freire; ao xornalista Javier Casqueiro; ao empresario José Luis Blanco; a piragüista Teresa Portela; e á Fundación Barrié. O titular do Executivo autonómico destacou que todos representan a Galicia Calidade e son exemplo dun territorio vivo e dinámico, do excelente capital humano que hai na comunidade, e da gran representación de galegos que hai fóra das nosas fronteiras.
Así, salientou canto ten mudado Galicia nos últimos anos, o que lle permitiu pasar de ser unha terra de emigración a unha de acollida; e a ser quen de captar investimentos de empresas líderes mundiais, como o xigante da automoción SAIC.
Na súa intervención, Rueda tamén puxo en valor o galeguismo aberto e integrador, sempre disposto a tender lazos coas comunidades de acollida. Neste sentido, defendeu que Galicia sempre entendeu que o progreso debe ser común, polo que rexeitou calquera trato discriminatorio con respecto a outras comunidades.
Por último, o presidente tamén dedicou unhas palabras para agradecer ao presidente de Aega-Cat, o empresario Amancio López Seijas, o seu compromiso con Galicia.
Imaxes relacionadas
