Santiago de Compostela, 7 de xullo 2026.

O xerente do Servizo Galego de Saúde, Luis León, participou hoxe no Instituto Português de Oncologia do Porto (IPO) na segunda xornada de traballo do Proxecto EQUIO (Equidade Oncolóxica Transfronteiriza), unha iniciativa destinada a consolidar unha rede integral de atención oncolóxica entre Galicia e o Norte de Portugal.

O proxecto, liderado polo Servizo Galego de Saúde e cofinanciado pola Unión Europea a través do Programa Interreg VI-A España–Portugal (POCTEP) 2021-2027, conta coa participación da Axencia Galega de Coñecemento en Saúde, ACIS, e do Instituto Português de Oncologia do Porto.

A reunión reúne representantes das tres entidades implicadas para dar continuidade ás actuacións previstas no proxecto durante 2026. Conta tamén coa participación do vicepresidente responsable da área de Saúde da Comisión de Coordinación e Desenvolvemento Rexional do Norte (CCDR-N), Jorge Mendes.

Entre os asuntos que se abordan figuran a harmonización dos protocolos asistenciais, o desenvolvemento de rutas clínicas compartidas e a aplicación da medicina de precisión no tratamento do cancro de pulmón e do cancro colorrectal.

Cooperación transfronteiriza para unha atención máis integrada

Co obxectivo de favorecer unha atención oncolóxica máis coordinada e equitativa para a cidadanía de Galicia e o Norte de Portugal, o Proxecto EQUIO estrutúrase arredor de catro grandes eixes de actuación: a mellora dos protocolos clínicos e das rutas asistenciais, a incorporación do diagnóstico molecular e da medicina personalizada, a creación dunha Rede Transfronteiriza Integral de Atención Oncolóxica entre ambos os territorios e o reforzo da formación especializada dos profesionais sanitarios.

O proxecto tamén recolle grupos de traballo específicos para compartir metodoloxías entre os comités moleculares de tumores e avanzar cara a unha atención máis personalizada, coordinada e baseada na evidencia científica.

A través desta iniciativa, o Servizo Galego de Saúde reforza a cooperación sanitaria coa rexión Norte de Portugal e contribúe aos obxectivos europeos en materia de equidade, innovación e medicina personalizada, impulsando un modelo de colaboración que aspira a converterse nun referente para futuras iniciativas transfronteirizas no ámbito da oncoloxía.