Santiago de Compostela, 9 de xullo de 2026

O xerente do Servizo Galego de Saúde, Luis León, salientou, hoxe, no Parlamento de Galicia, as medidas adoptadas pola Xunta para reforzar as urxencias hospitalarias de Ourense.

Tal e como adiantou esta semana o conselleiro de Sanidade, o Servizo Galego de Saúde convocará un concurso de méritos, antes de finais de ano, para dar cobertura estable ás prazas das urxencias hospitalarias de Ourense.

Durante a súa intervención, o xerente do Sergas apuntou que este “é un problema estrutural derivado das xubilacións, do incremento da demanda asistencial, do envellecemento da poboación e da escaseza de especialistas nalgunhas áreas clave”.

Do mesmo xeito, Luis León destacou a revisión realizada sobre o plan funcional do Servizo de Urxencias, unha importante actuación do Executivo galego na que participaron profesionais do propio servizo, e que permitirá revisar os fluxos de pacientes, os circuítos asistenciais e a coordinación entre servizos.

Neste senso, adoptáronse medidas organizativas, como o reforzo da garda da área médica, que permite mellorar a fluidez dos ingresos, axilizar a toma de decisións clínicas e reducir a presión asistencial sobre este servizo.

Melloras laborais e retributivas para o persoal facultativo

No marco da Comisión 5ª de Sanidade, Política Social e Emprego, o xerente do Sergas, lembrou que a Xunta aprobou recentemente importantes melloras para os facultativos de urxencias, que suporán arredor de 3.560 euros máis ao ano para cada profesional de urxencias hospitalarias.

Luis León explicou que actualmente, o Servizo Galego de Saúde conta con 149 prazas máis de médicos de urxencias hospitalarias que no ano 2024. Recentemente incorporáronse 29 novos facultativos a este servizo, tras finalizar a súa formación especializada.

Ademais, lembrou que Galicia xa está a formar aos primeiros especialistas en Medicina de Urxencias e Emerxencias co que garantirá o relevo xeracional e a cobertura futura das urxencias.