Moaña (Pontevedra), 17 de xullo de 2026

O novo centro de saúde de Moaña acolleu un total de 17.580 actos asistencias durante o seu primeiro mes de funcionamento, entre a actividade programada de consultas e a atención de urxencias en horario de tarde durante a semana.

Entre a actividade asistencial ordinaria prestada, un total de 17.158 consultas, destacan as 8.432 consultas de medicina de familia; as 5.598 de enfermería; 912 de fisioterapia; 866 de pediatría ou as 314 coa matrona, que se suman ás consultas de odontoloxía (295) hixiene bucodental (256), nutrición (87), traballo social (196), farmacia (33) e función administrativa (169).

No ámbito da atención urxente, a actividade na quenda de tarde, para o que se dotou o novo centro de saúde de médico e enfermeira, rexistrou un total de 422 asistencias desde a súa posta en marcha o pasado 15 de xuño.

Pola súa banda, a ambulancia de soporte vital avanzado con base en Moaña efectuou 98 mobilizacións neste mesmo período no que se ampliou o seu horario as 24 horas os 7 días da semana. Na franxa horaria  de 00 a 08,59 horas, rexistráronse só 13 asistencias, mentres que na franxa entre as 21 e as 00 horas producíronse 10 mobilizacións.

Do total de asistencias da ambulancia de soporte vital avanzado, 55 corresponderon a pacientes do propio municipio, mentres que o resto de desprazamentos se distribuíron principalmente entre Cangas e outras localidades da contorna. Os motivos de asistencia máis frecuentes foron as alteracións do nivel de consciencia, con 17 intervencións; os cadros de dor, con 14; e os accidentes de tráfico, con 11.

Investimento de 9,6 millóns de euros

A posta en funcionamento do novo Centro de Saúde de Moaña supuxo o maior investimento sanitario realizado pola Xunta no municipio, cun total de 9,6 millóns de euros destinados á súa construción e equipamento.Os 3.000 metros cadrados cos que contan as novas instalacións, triplican a superficie do anterior centro de saúde e permiten concentrar nun único edificio unha ampla carteira de servizos asistenciais.

O centro conta con oito consultas de medicina xeral e oito de enfermería. Tamén dispón de dúas consultas de pediatría e dúas de enfermería pediátrica, así como área da muller e outra para o persoal.

Dispón de servizo de saúde bucodental, cunha consulta de odontoloxía e outra de hixienista; e fisioterapia, cunha consulta, área de recuperación de solo pelviano e sala de rehabilitación con catro cabinas, que co seu traslado ao novo centro de saúde ofrece tamén servizos polas tardes.

Ademais o centro dispón de consulta de psicoloxía de atención primaria, no marco da rede de psicoloxía de primaria posta en marcha pola Xunta.

O centro garante atención urxente á poboación os sete días da semana as 24 horas do día, ao contar cun facultativo e cunha enfermeira que atenden as consultas urxentes da veciñanza de Moaña polas tardes e ata as dez da noite e dispoñer de horario ampliado da ambulancia de soporte vital avanzado de enfermería, pasado de operar 12 horas a 24 horas.