Santiago de Compostela, 21 de xullo de 2026

Galicia participa por primeira vez no programa do CERN (Organización Europea para a Investigación Nuclear) para divulgar a ciencia en festivais musicais de toda Europa. A iniciativa terá lugar no marco do Festival Revenidas, do 10 ao 13 de setembro, en Vilaxoán, no que se instalará o espazo Ondas e Partículas cun programa de conferencias de destacados científicos. O conselleiro de Ciencia, Román Rodríguez, destacou o impacto destas iniciativas para achegar a I+G+i a todos os públicos e mellorar a cultura científica xeral, un dos retos da futura Lei de ciencia e innovación.

O CERN Festival Programme é o programa de divulgación do laboratorio de física de partículas máis grande do mundo, ubicado na fronteira entre Suiza e Francia. Galicia é un dos lugares elixidos para esta edición do proxecto, a décima, a través do Instituto Galego de Física de Altas Enerxías (IGFAE), centro mixto da Universidade de Santiago de Compostela (USC) e a Xunta de Galicia que forma parte da Rede CIGUS de centros de excelencia, en colaboración co Festival Revenidas, a CERN & Society Foundation e a Fundación Española para a Ciencia e a Tecnoloxía (FECYT).

O conselleiro de Ciencia destacou na presentación desta iniciativa que se trata dunha iniciativa óptima para levar a ciencia a novos espazos e públicos e para concienciar da potencia da nosa I+G+i. “Trátase de achegar o coñecemento científico de maneira accesible e participativa e este tipo de actividades contribúen, a maiores de reforzar a divulgación, a atraer talento científico á nosa Comunidade”, indicou Román Rodríguez.

Charlas de prestixiosos científicos

No espazo científico que se ubicará no Festival Revenidas no mes de setembro participarán nomes de referencia na divulgación e na investigación en Galicia e en España, como Eduardo Sáenz de Cabezón, matemático e presentador do programa Órbita Laika de TVE;  Verónica Bolón, investigadora da Universidade da Coruña e premio Nacional de Investigación María Andresa Casamayor; os investigadores do IGFAE Juan Calderón Bustillo, Marta Reina Campos e o propio José Edelstein; así como persoas con amplo seguimento nas redes sociais, como Adrián García (El Físico Barbudo), que falará sobre a física que hai detrás dos pogos nos concertos; ou a investigadora do CERN Paula Desiré, que abordará as claves físicas detrás da protonterapia.

Neste 2026 o CERN Festival Programme cumpre 10 anos e, ademais de Galicia, terá escenarios no Reino Unido, República Checa, Dinamarca, Alemaña e Texas (Estados Unidos).

Futuro acelerador de partículas

O IGFAE conta cunha longa experiencia e traxectoria de cooperación co CERN. Nestes momentos, Galicia traballa para conseguir montar na nosa Comunidade un prototipo para o futuro acelerador de partículas do CERN, un dos proxectos científicos e tecnolóxicos máis ambiciosos dos próximos anos no ámbito internacional. Máis de 130 empresas e axentes de I+D+i demostraron o seu interese para participar neste proceso, que involucrará a distintos países.

O futuro colisionador será unha infraestrutura científica de máis de 90 km de circunferencia baixo a fronteira entre Francia e Suíza, clave para impulsar avances en ámbitos con aplicación directa na sociedade como materiais supercondutores, aceleradores e detectores para uso médico, enerxía ou sistemas de transmisión eléctrica.

 Futura Lei de ciencia e innovación

A divulgación científica e o achegamento á ciencia son medidas que se terán en conta na nova Lei de ciencia e innovación que prepara a Xunta e que acompañará o gran momento que vive este sector na Comunidade. Esta normativa suporá un salto cualitativo e cuantitativo, xa que será a base para o avance que vive a I+G+i.