Pontevedra, 22 de xullo de 2026

O director da Axencia Galega da Calidade Alimentaria da Consellería do Medio Rural, Martín Alemparte, visitou hoxe o Centro de Formación e Experimentación Agroforestal (CFEA) de Lourizán, onde se está a desenvolver unha nova acción formativa para impulsar a formación de persoas en risco de exclusión social, organizada ao abeiro do convenio de colaboración subscrito con Cáritas Diocesana de Santiago.

Esta actividade constitúe a segunda formación levada a cabo, despois da experiencia desenvolvida no CFEA de Guísamo, e confirma a boa evolución dunha colaboración que aposta pola formación como ferramenta de inclusión social, de autonomía persoal e de creación de novas oportunidades laborais.

O curso está orientado ao mantemento de xardíns e zonas verdes e inclúe formación práctica no manexo de rozadoira e outra maquinaria de xardinaría. Complétase cun curso para a obtención do carné básico de aplicador de produtos fitosanitarios, de maneira que as oito persoas participantes reciben un total de 80 horas de formación teórica e práctica, adquirindo coñecementos e competencias que facilitan a súa incorporación ao mercado laboral.

Durante a visita, Alemparte destacou que “a formación é unha das ferramentas máis eficaces para crear oportunidades, favorecer a autonomía das persoas e facilitar a súa integración laboral”. Neste sentido, puxo en valor que esta iniciativa demostra que “cando se unen os recursos da Administración e o compromiso das entidades sociais é posible desenvolver proxectos útiles que melloran a vida das persoas”.

O director da Axencia salientou tamén que esta experiencia evidencia o potencial da rede de Centros de Formación e Experimentación Agroforestal de Galicia como un recurso público ao servizo da sociedade. “Os nosos CFEA nacen para formar aos profesionais do sector agrario, pero tamén poden contribuír a responder a outros retos sociais, poñendo o seu coñecemento, as súas instalacións e o seu persoal ao servizo das persoas que máis o precisan”, sinalou.

Nesta liña, avanzou a vontade da Consellería do Medio Rural de seguir impulsando novas accións formativas deste tipo noutros dos seus CFEA co obxectivo de ampliar as oportunidades de capacitación e inserción laboral de persoas en situación de vulnerabilidade e consolidar a rede pública de formación agraria como unha ferramenta de inclusión social, igualdade de oportunidades e desenvolvemento do territorio.