Santiago de Compostela, 23 de xullo de 2026

A Xunta vén de publicar, no Portal de contratos Públicos de Galicia, a licitación, por un importe de 670.008,33 euros e unha vixencia de 24 meses, do servizo de transporte de carros de roupa e comida entre o Hospital Naval e o Hospital Arquitecto Marcide de Ferrol. 

Esta licitación está reservada a centros especiais de emprego de iniciativa social ou empresas de inserción.

O contrato, que abarca actividades nas unidades de cociña e lavandería, ten por obxecto o transporte intercentros de carros de comida e roupa do servizo de hostalería entre ambos os hospitais.

No marco das actuacións do Plan director, as unidades de hostalería (lavandería e cociña) foron trasladadas ao edificio do Hospital Naval, mentres que a maior parte dos usuarios destes servizos se atopan no Hospital Arquitecto Marcide. Esta situación fai necesario o traslado diario de carros de comida e roupa entre ambos os centros para garantir o correcto funcionamento asistencial. 

Deste xeito, as tarefas previstas no contrato na unidade de cociña son o transporte de bandexas, retorno dos carros e atención a servizos extraordinarios. O volume de carros estimados é de 15 para almorzo e merenda e 25 para comida e cea.

Por outra banda, as funcións previstas na unidade de lavandería son o transporte de carros de roupa limpa e o retorno dos carros con roupa sucia.

Para poder desenvolver este labor requírese un mínimo de catro vehículos, dous para cada unidade, que cumpran coas características solicitadas.

As empresas interesadas en participar neste procedemento teñen ata o vindeiro 21 de agosto para presentar as súas ofertas.