Laxe (A Coruña), 8 de agosto de 2026

A conselleira do Mar, Marta Villaverde, destacou hoxe na xornada “No mar da lonxa de Laxe”, organizada pola Confraría de Pescadores Santa María da Atalaia, a calidade excepcional dos peixes e mariscos galegos e a súa contribución como proteína de alta calidade para unha dieta saudable.

Durante o evento, Villaverde recibiu, xunto coa chef Lucía Freitas, o recoñecemento, de “Embaixadora dos Peixes e Mariscos de Laxe”, da man do patrón maior da confraría, Raúl Villar. Este acontecemento festivo e cultural ten como obxectivo principal poñer en valor a excelente calidade dos peixes e mariscos capturados pola frota costeira artesanal, resaltando o papel fundamental do sector pesqueiro na economía e na identidade desta vila mariñeira.

A Consellería do Mar colabora nestas xornadas, que celebran a súa quinta edición, co subministro de produtos do mar e a súa elaboración.