Vigo, 28 de agosto de 2026

A conselleira do Mar, Marta Villaverde, participou hoxe na inauguración da XIX Festa do Marisco de Vigo, organizada pola Asociación de Comercializadores de Peixe de Vigo (Acopevi) no porto pesqueiro do Berbés, onde puxo en valor esta cita como escaparate da excelencia dos produtos do mar de Galicia e do traballo dos profesionais que integran toda a súa cadea de valor.

Durante a súa intervención, Villaverde destacou a contribución de Acopevi á promoción dos peixes e mariscos galegos e ao fortalecemento da súa presenza tanto no mercado nacional como en destinos internacionais. Neste sentido, salientou o importante labor desenvolvido polo sector comercializador para facer chegar produtos pesqueiros galegos aos consumidores mantendo os máximos estándares de calidade, frescura, seguridade alimentaria e trazabilidade.

A titular de Mar incidiu tamén na fortaleza do complexo Mar-Industria galego e na súa capacidade para afrontar os retos aos que se enfronta. “Temos a responsabilidade de seguir elevando a competitividade dos nosos produtos do mar, o seu recoñecemento e a preferencia polo seu consumo tanto dentro como fóra de Galicia”, sinalou.

Neste contexto, Villaverde destacou que eventos como a Festa do Marisco de Vigo permiten divulgar a calidade nutricional e gastronómica dos produtos pesqueiros, fomentar o seu consumo e, ao mesmo tempo, render homenaxe aos profesionais do mar e ás xeracións que contribuíron a consolidar a tradición mariñeira e gastronómica de Vigo.

A Consellería do Mar colabora coa organización desta XIX edición da Festa do Marisco, que se celebra durante oito xornadas repartidas entre os días 27 e 30 de agosto e do 3 ao 6 de setembro. A organización prevé superar os 50.000 visitantes no recinto do porto pesqueiro do Berbés, onde se poderá degustar unha ampla variedade de produtos da ría e das lonxas galegas.