Madrid, 17 de setembro de 2026

O conselleiro de Sanidade, Antonio Gómez Caamaño, participou esta tarde, en Madrid, na presentación do libro Galicia Vive+,  onde destacou o papel da comunidade galega como “laboratorio natural” para comprender e estudar os factores que fan posible unha lonxevidade saudable. 

Coordinado pola doutora María Pilar Rodríguez Ledo e publicado por Ézaro Edicións, Galicia Vive+ aborda dun xeito multidisciplinar os factores que inciden no envellecemento da poboación, atendendo a diversos factores como poden ser a xenética, a inmunoloxía, a neuroloxía, a nutrición ou actividade física. Neste sentido, o responsable da carteira sanitaria da Xunta salientou o valor e a calidade dunha publicación “na que se demostra que a lonxevidade non pertence a unha única disciplina”.

Durante a súa intervención, o conselleiro de Sanidade subliñou que Galicia conta na actualidade con preto de 1.800 persoas centenarias, o que representa ao redor do 12 % de todo o Estado.

A ese respecto, Gómez Caamaño lembrou a importancia de que as políticas sanitarias públicas non se limiten a procurar acadar máis anos de vida, senón que o obxectivo debe ser garantir que eses anos se vivan coa maior calidade e autonomía posible. “A verdadeira lonxevidade non se mide só en tempo, mídese sobre todo no benestar”, afirmou.

Con este obxectivo, abundou o conselleiro, o Executivo galego puxo en marcha nos últimos anos diferente iniciativas, como poden ser os  plans Obesidade Zero e Adestra a túa Saúde, así como o Rexistro galego de persoas centenarias (Regace), orientado a investigar os determinantes biolóxicos, xenéticos e ambientais da lonxevidade.

No peche do acto, que tamén contou coa participación do presidente do Parlamento de Galicia, Miguel Santalices, o titular de Sanidade insistiu en que o mellor medicamento consiste na prevención, na alimentación equilibrada, na actividade física ou descanso e o benestar emocional.