Santiago de Compostela, 22 de setembro de 2026

A Xunta vén de publicar no Portal de Contratos Públicos de Galicia, a licitación, por un importe de 62.532,80 euros, da subministración sucesiva de probas rápidas para a diagnose en fluído oral de VIH e o virus da hepatite C.

O contrato terá unha duración de 12 meses, contemplando a posibilidade de ser prorrogado por un período máximo de dous anos.

Estes test permiten o diagnóstico precoz da infección polo VIH e da hepatite C, posibilitando asi o inicio do seu o tratamento, ao tempo que se frea a súa transmisión.

As probas consisten nun inmunoensaio cualitativo para o diagnóstico in vitro, dun solo emprego e con materiais individualizados para cada proba, para detectar anticorpos do virus de inmunodeficiencia humana tipo 1 e 2 (VIH-1/2) ou de hepatite C en mostra de fluído oral.

As empresas interesadas neste procedemento teñen ata o vindeiro 7 de outubro para presentar as súas ofertas.

Plan pioneiro

A comezos deste ano, a Xunta puxo en marcha un plan pioneiro para acabar coas infeccións de transmisión sexual como problema de saúde pública no horizonte de 2030.

O plan marca como meta reducir a incidencia de cada unha das infeccións de transmisión sexual nun 5 % cada ano e, para conseguir estes obxectivos, o Goberno galego conta cun orzamento de 195 millóns de euros en cinco anos, dos que 177 se destinan a ferramentas de diagnóstico e tratamento. Tamén se fará un forte esforzo en prevención, ademais de investigación e concienciación social.