Santiago de Compostela, 25 de setembro de 2026

O conselleiro de Sanidade, Antonio Gómez Caamaño, salientou hoxe,  na xornada divulgativa organizada por AHOSGAL Os hospitais, teñen futuro?, a transformación dos hospitais galegos cara a un modelo máis integrado, tecnolóxico, resolutivo, centrado en responder ás novas necesidades dos pacientes reducindo os ingresos.

A hospitalización a domicilio, os hospitais de día, a cirurxía ambulatoria ou o seguimento domiciliario permiten prestar atención hospitalaria noutras contornas e avanzar cara a unha rede máis integrada entre hospital, Atención Primaria e domicilio.

Así mesmo, a xenómica, a medicina personalizada, a cirurxía robótica, as terapias avanzadas ou a protonterapia xa forman parte tamén da transformación da sanidade pública galega.

Galicia conta cun Centro de Fabricación de Terapias Avanzadas e está a desenvolver proxectos pioneiros como Xenoma Galicia ou o IMPaCT-Xenómica. Ademais, o Centro de Protonterapia de Galicia será o primeiro da sanidade pública de España e estará tratando aos seus primeiros pacientes en poucos meses.

O Servizo Galego de Saúde está a incorporar ferramentas de intelixencia artificial (IA), automatización e análise avanzada de datos para apoiar a práctica clínica, mellorar os procesos asistenciais e reducir cargas administrativas. Do mesmo xeito, está a desenvolver solucións de IA xerativa para apoiar a elaboración de informes, resumir información da historia clínica ou automatizar determinados procesos clínicos e administrativos, sempre coa validación dos profesionais.

A sanidade pública galega conta con preto de 49.000 profesionais, aos que se incorporan  cada vez máis perfís vencellados á investigación, á enxeñería, á tecnoloxía ou á análise de datos, dentro de equipos máis multidisciplinares.

A rede hospitalaria pública galega está formada por 14 hospitais e complexos hospitalarios integrados nas sete áreas sanitarias. Os orzamentos deste ano, 2026, destinan 3.598 millóns de euros á atención hospitalaria, un 3,45 % máis que no exercicio anterior.

Ademais, destínanse 210 millóns de euros a grandes obras hospitalarias en execución e para melloras de mobiliario, equipamento e alta tecnoloxía. Dentro desta contía, 162,7 millóns está destinados especificamente á transformación das infraestruturas hospitalarias.

Un exemplo recente é o novo Hospital de Día de Procesos do Hospital Álvaro Cunqueiro, no que a Xunta investiu máis de 1,2 millóns de euros, destinado a ampliar a capacidade asistencial e ofrecer unha alternativa ao ingreso para tratamentos intravenosos e biolóxicos, transfusións, ferro ou antibióticos, entre outros.