Vilanova de Arousa (Pontevedra), 8 de outubro de 2026

A directora xeral de Desenvolvemento Pesqueiro, Ángeles V. Suárez, desprazouse ao porto deste municipio para participar, xunto aos profesionais do sector, nunha xornada de sementeira de bivalvo dirixida á recuperación das zonas de produción marisqueira. Os traballos consistiron na achega e espallado de 110.000 unidades de ameixa babosa (Venerupis corrugata), cun peso de 60 quilogramos e unha talla media de 17 milímetros, baixo a supervisión do persoal técnico de recursos mariños da Consellería do Mar e a asistencia técnica do pósito. A esta semente sumouse un lote de ameixa xaponesa financiado polo concello arousano.

A responsable autonómica, acompañada polo alcalde de Vilanova de Arousa, Gonzalo Durán, sinalou que a actuación forma parte dos traballos de semicultivo e mantemento dos hábitats litorais que se levan a cabo en coordinación coa Confraría de Pescadores A Pastoriza de Vilanova de Arousa. Estas intervencións encádranse nas medidas técnicas de restauración ambiental articuladas para facer fronte ás perdas de biomasa derivadas dos episodios de fortes choivas e baixada de salinidade rexistrados durante o ano, que requiriron a adaptación dos plans de explotación e o peche temporal da actividade extractiva para favorecer a rexeneración natural dos recursos.

A actividade desenvólvese ao abeiro dos proxectos de restauración e do convenio subscrito entre a Xunta e o pósito, cun orzamento superior aos 483.500 euros. Este marco de traballo programa diversas tarefas sobre os areais, como o acondicionamento do substrato, o control de especies depredadoras e a realización de mostraxes periódicas para avaliar a evolución das poboacións e restablecer a capacidade produtiva das zonas marisqueiras.