Santiago de Compostela, 18 de outubro de 2026

Galicia participou esta semana nunha reunión celebrada en Helsinki (Finlandia) con motivo do lanzamento do proxecto europeo AURORad, para a mellora da calidade e a seguridade dos procedementos médicos con radiacións ionizantes.

A Consellería de Sanidade, a través do Servizo Galego de Saúde, da Axencia Galega de Coñecemento en Saúde (ACIS) e da Empresa Pública de Servizos Sanitarios Galaria, forma parte do consorcio constituído por 110 organizacións de 29 países europeos, entre elas, autoridades sanitarias, organismos de protección radiolóxica, hospitais, universidades e entidades científicas.

Así, a iniciativa dispón dun orzamento total de 14,37 millóns de euros, dos cales aproximadamente 11,5 millóns están financiados pola Unión Europea a través do programa EU4Health.

Entre outubro de 2026 e setembro de 2031 desenvolverase o proxecto baixo a coordinación da autoridade finlandesa de seguridade radiolóxica e nuclear STUK.

A delegación galega na capital finlandesa estivo integrada polo director da área de Desenvolvemento e Innovación Sanitaria de ACIS, José María Romero, e os profesionais especialistas neste ámbito de Galaria, Antonio López Medina, Benito Andrade Álvarez e Francisco Mosquera-Pena.

Participación conxunta

A participación da Consellería de Sanidade de Galicia reforza a colaboración internacional do sistema sanitario público da comunidade en materia de protección radiolóxica e calidade asistencial.

Neste senso, permitirá compartir experiencia e coñecementos con organizacións europeas e contribuír á elaboración e implantación de boas prácticas.

AURORad enmárcase no Plan de Acción SAMIRA da Comisión Europea e contribúe aos obxectivos do Plan Europeo de Loita contra o Cancro.

As súas liñas de traballo abranguen a xustificación de probas diagnósticas, as auditorías clínicas, a aprendizaxe de incidentes a xestión de doses e a calidade de imaxe. Tamén a protección en imaxe pediátrica e ao longo do embarazo, a radioterapia guiada por imaxe e a terapia radiofarmacéutica.

Funcións das entidades

O Servizo Galego de Saúde contribuirá en distintos paquetes de traballo relacionados coa auditoría clínica e xustificación de procedementos, sistemas de aprendizaxe de incidentes, xestión de doses e calidade de imaxe, radioterapia guiada por imaxe e formación.

Pola súa parte, ACIS achegará recursos e experiencia na xestión de proxectos de innovación, capacitación, xestión do coñecemento e transferencia de resultados aos profesionais sanitarios como co-líder do paquete de traballo de capacitación xunto coa Universidade de Magdeburgo de Alemaña.

Finalmente, Galaria liderará tarefas técnicas de aprendizaxe de incidentes e xestión de doses, aportando a súa experiencia e liderado técnico en seguridade radiolóxica e calidade de imaxe.