Aberta ao público ata o 2 de novembro
A Xunta destaca a posta en valor do patrimonio ferroviario como atractivo para o turismo sostible na mostra da Vía Verde Compostela-Tambre-Lengüelle
A exposición, inaugurada en Santiago de Compostela, divulga a historia do antigo trazado ferroviario que atravesa cinco concellos da provincia da Coruña
Xosé Merelles subliñou a capacidade deste tipo de iniciativas para recuperar e poñer en valor o patrimonio ferroviario como recurso turístico
Santiago de Compostela, 22 de outubro de 2026
O director de Turismo de Galicia, Xosé Merelles, participou hoxe na inauguración da exposición ‘Historia Ferroviaria do Antigo Trazado da Vía Verde CTL’, no centro comercial Área Central, onde poderá visitarse ata o vindeiro 2 de novembro.
Organizada pola Asociación de Concellos da Vía Verde CTL, a mostra dá a coñecer a historia da antiga liña ferroviaria e a súa importancia para as comunicacións e o desenvolvemento territorial.
Xosé Merelles destacou a importancia de iniciativas como esta para “recuperar e poñer en valor o patrimonio ferroviario como recurso turístico, cultural e de lecer, ao tempo que se dinamizan os territorios do interior”.
Neste sentido, o director de Turismo de Galicia subliñou tamén que a Vía Verde Compostela-Tambre-Lengüelle, con aproximadamente 26 quilómetros de percorrido polos concellos de Santiago, Oroso, Ordes, Tordoia e Cerceda, “é un exemplo de turismo sostible que combina natureza, patrimonio e actividade física”, creando “novas oportunidades para o desenvolvemento do medio rural”.
En 2025, o turismo de natureza mobilizou en Galicia 477.000 turistas, que xeraron máis de 3,3 millóns de noites. O gasto total asociado a esta modalidade alcanzou os 222,6 millóns de euros, cun gasto medio diario de 67 euros por persoa.
Imaxes relacionadas
