Oroso (A Coruña), 8 de novembro de 2026

A delegada da Xunta na Coruña, Belén do Campo,  xunto aos alcaldes de Oroso, Alex Doval, asistiu este domingo á XVII edición da Festa da Matanza de Trasmonte, no municipio de Oroso, unha celebración popular organizada pola Asociación de Veciños A Pena do Tesouro que cada ano reúne numerosos veciños e visitantes arredor dunha das tradicións máis representativas da cultura e da gastronomía galegas.

Durante a súa asistencia, Belén do Campo puxo en valor o labor que desenvolven as asociacións veciñais para conservar e transmitir costumes que forman parte da identidade de Galicia, ao tempo que contribúen a dinamizar as parroquias, favorecer a convivencia e manter viva a actividade social no rural.

A delegada salientou que festas como a de Trasmonte son moito máis ca unha celebración gastronómica, xa que permiten recuperar e dar a coñecer os coñecementos e os costumes vinculados á tradicional matanza do porco, unha práctica que durante xeracións tivo un papel fundamental na vida das familias galegas e na economía doméstica do campo.

Neste sentido, destacou a importancia da colaboración entre as administracións e o tecido asociativo para apoiar iniciativas que preservan o patrimonio inmaterial, promocionan os produtos tradicionais e contribúen a dar visibilidade ao potencial gastronómico e cultural das localidades galegas. Nesta liña a delegada lembrou que a Xunta apoia este evento principalmente a través de la Axencia de Turismo de Galicia. 

A Xunta de Galicia mantén o seu compromiso con este tipo de celebracións populares, que axudan a conservar os sinais de identidade propios de cada territorio, reforzan o sentimento de pertenza e constitúen tamén un atractivo para achegar visitantes ás localidades do interior.

A xornada desenvolveuse na Carballeira de San Román e contou cunha feira de produtos propios da matanza, na que os asistentes puideron adquirir produtos tradicionais como cachuchas, lacóns, chourizos e roxóns, elaborados seguindo os costumes desta práctica ancestral.

O programa comezou ás 12.30 horas coa apertura do recinto, continuou ás 13.00 horas coa actuación musical de Aires de Broña e, a partir das 14.00 horas, celebrouse o xantar popular, cun menú protagonizado polos produtos derivados do porco. A feira de produtos da matanza permaneceu aberta durante toda a xornada.

Contexto histórico da celebración

A Festa da Matanza de Trasmonte conta cunha longa traxectoria. En 2009, cando se celebraba a súa cuarta edición, a convocatoria xa conseguira reunir arredor dun milleiro de comensais e repartir uns 2.000 quilos de carne de porco.

Esta é unha iniciativa que naceu da vontade dos propios veciños de recuperar a celebración colectiva da matanza e contribuír tamén a sufragar as festas patronais de San Román. Co paso dos anos, a festa consolidouse como unha cita destacada do calendario gastronómico e festivo da comarca de Ordes.