A Xunta destinou nos últimos anos case 773.000 euros en melloras no concello de Rodeiro

O vicepresidente primeiro da Xunta, Alfonso Rueda, visitou hoxe o concello de Rodeiro, onde o Goberno galego leva investidos nos últimos anos case 773.000 euros en actuacións ambientais e de infraestruturas coas que mellorar os servizos municipais e, por ende, a calidade de vida dos cidadáns. Á visita tamén acudiu a delegada territorial da Xunta en Pontevedra, Luisa Piñeiro.

Alfonso Rueda destacou a importancia de manter unha colaboración fluída cos concellos “con pequenos investimentos que aportan solucións ás súas necesidades e lles permiten poñer en marcha servizos de grande nivel equiparables ós das cidades cos que favorecer aos seus veciños”. Nesta liña, sinalou a necesidade destas axudas da Xunta para que as entidades locais, “sobre todo as máis pequenas”. poidan seguir sacando adiante proxectos que “sen este apoio lles resultaría máis complicado”.

Durante a visita e da man do alcalde, Luis López, o vicepresidente primeiro da Xunta coñeceu os proxectos levados a cabo este ano ao abeiro do Fondo de Compensación Ambiental. A través desta liña de axudas, a Xunta financiou con máis de 50.700 euros os gastos da adquisición de equipamento para distintos servizos. Destacan a compra dun remolque cunha máquina de limpeza, valorado en máis de 10.500 euros, ou o investimento de case 6.000 euros na mellora da eficiencia enerxética do centro cultural Manuel Llamazares.

Ademais, no marco destas subvencións da Administración autonómica, o concello tamén adquiriu 25 novos contedores de lixo e case 70 elementos de aceiro inoxidable para suxeitalos, que supuxeron achegas de máis de 4.000 e 14.700 euros respectivamente. Tamén no servizo de recollida do lixo, as axudas da Xunta permitiron financiar con case 15.000 euros o custo do tratamento dos residuos urbanos.

Por outra parte, o Goberno galego asinou este ano co concello de Rodeiro un convenio de colaboración, mediante o que achegou máis de 13.000 euros para reparar as fugas de auga da piscina municipal. A Xunta dá resposta así a esta necesidade do municipio que requiría actuar con urxencia para evitar vertidos contaminantes.

O proxecto alíñase tamén cos obxectivos do Fondo de Compensación Ambiental, que este ano conta cun orzamento de 12,5 millóns de euros dirixidos a financiar os custos dos concellos en servizos dedicados á protección do medio ambiente e o espazo natural, ao impulso da eficiencia enerxética, á conservación da biodiversidade e á utilización do uso recreativo e didáctico dos recursos naturais de Galicia.