A directora xeral de Xuventude, Participación e Voluntariado, Cristina Pichel, acompañada da directora de Turismo de Galicia, Nava Castro, visitou o campamento 'O sabor do verán'
A Xunta sitúa os campamentos de verán como unha oportunidade para fomentar a aprendizaxe non formal
Os participantes, de entre 10 e 13 anos, introdúcense nas técnicas da cociña creativa ou da repostería, entre outras actividades
Trátase da segunda quenda deste campamento que ten lugar no Centro Superior de Hostalería de Galicia
A directora xeral de Xuventude, Participación e Voluntariado, Cristina Pichel, situou os campamentos de verán como unha oportunidade para fomentar a aprendizaxe non formal durante a súa visita ao campamento ‘O sabor do verán’, na que estivo acompañada da directora de Turismo de Galicia, Nava Castro.
Este campamento está a desenvolver a súa segunda quenda durante estes días no Centro Superior de Hostalería de Galicia e nel mozas e mozos de entre 10 e 13 anos achéganse a técnicas da cociña creativa ou da repostería. Son algunhas das actividades que se complementan con rutas de sendeirismo, obradoiros de reciclaxe ou o coñecemento da flora e da fauna da súa contorna.
A directora xeral de Xuventude destacou que este tipo de iniciativas, ademais de permitir que as familias conten un servizo de conciliación durante a tempada estival, achegan á mocidade novos coñecementos en disciplinas menos coñecidas para eles. O programa rematará mañá domingo.
Pola súa parte, a directora de Turismo de Galicia lembrou a importancia que ten a gastronomía na oferta turística galega, e que se sitúa ano tras ano no segundo lugar entre as preferencias dos turistas que nos visitan, dacordo cos estudos de demanda que elabora a Axencia de Turismo de Galicia. Tamén se referiu á formación como un dos piares fundamentais da oferta e á necesidade de difundir á poboación os valores gastronómicos xa desde idades temperás aos máis cativos.