A conselleira de Medio Ambiente, Territorio e Vivenda, Ángeles Vázquez, ofreceu esta mañá unha rolda de prensa tras publicarse a nova normativa no BOE

A Xunta recorrerá ante a xustiza a orde estatal do lobo e esixirá que se paralice a súa aplicación

A decisión do Ministerio para a Transición Ecolóxica e o Reto Demográfico deixará sen efecto os plans de xestión da especie aprobados por cada comunidade

A conselleira advirte de que con esta medida se deixa nunha situación “moi delicada” ao sector gandeiro, sobre todo tendo en conta que o Estado non prevé un incremento de recursos económicos nin humanos a mobilizar pola súa parte

Santiago de Compostela, 21 de setembro de 2021
Compartir
  • whatsapp

A Xunta de Galicia recorrerá ante os tribunais a orde ministerial pola que se inclúe o lobo ibérico na Listaxe de especies silvestres de protección especial (Lesrpe) e pedirá que se adopten medidas cautelares de suspensión que paralicen súa eficacia ata que haxa un pronunciamento final da xustiza.

Así o anunciou esta mañá a conselleira de Medio Ambiente, Territorio e Vivenda, Ángeles Vázquez, nunha rolda de prensa convocada tras publicarse hoxe no Boletín Oficial do Estado a orde coa que o Ministerio para a Transición Ecolóxica e o Reto Demográfico (Miterd) modifica o nivel de protección da especie e inclúe tamén no Lesrpe todas as poboacións de lobo ao norte do río Douro

Esta decisión, segundo explicou a conselleira, “non se ampara en ningún estudo científico” e afectará de forma directa a Galicia, unha das principais comunidades lobeiras de España xa que xunto a Asturias, Cantabria e Castela e León aglutina o 95% dos exemplares de lobos de todo o país.

“Estamos ante unha medida que nos causa sorpresa, frustración e indignación. É moi triste que por parte dun Ministerio non haxa diálogo coas comunidades que ao longo de moitos anos tivemos os nosos plans específicos de protección do lobo”, declarou Ángeles Vázquez, despois de lembrar que onte mesmo estivo nas illas Cíes co ministro de Agricultura, Luis Planas, e o secretario de estado de Medio Ambiente, Hugo Morán, e ningún deles quixo falar da situación do lobo.

Neste sentido, lembrou que a Xunta leva anos xestionando as poboacións desta especie en solitario e con éxito, como demostra o feito de que desde 2009 conta cun plan de xestión propio grazas ao cal logrou garantir durante máis dunha década un equilibrio perfecto entre a protección destes animais e á vez, a dos gandeiros.

Sen embargo, a conselleira sinalou que, a partir de agora, “a potestade” que tiñan as comunidades e os seus plans de xestión “decaen” e por tanto, “os gandeiros e a xente que vive no rural quedan nunha situación moi delicada”.

Así, Ángeles Vázquez salientou o impacto directo que terá para este sector a inclusión do lobo no Lesrpe en condicións “asimilables” a especies en perigo de extinción como o cabaliño de mar, o lince ibérico, o mazarico real ou o trevo de catro follas, tendo en conta, ademais, que a Xunta xa non poderá conceder axudas económicas, como facía ata o de agora, ás explotacións afectadas polos danos que causen estes animais.

“Foi o Ministerio para a Transición Ecolóxica o que quixo ter a potestade sobre o lobo e é o propio Ministerio quen debe solventar as posibles problemáticas ou danos que poida provocar o lobo. A Comunidade queda nun aparte e, tal e como establece a propia orde, só é para protexer ao lobo”, declarou a conselleira, quen engadiu que “en perigo de extinción, segundo o Ministerio, está o lobo, non o gandeiro”.

Neste sentido, recalcou que a orde sinala que a súa entrada en vigor “non suporá o incremento dos recursos humanos e económicos” por parte do Estado, algo que “carece de sentido” cando a partir de agora as comunidades xa non poderán adoptar determinadas medidas para o control e xestión do lobo nos seus territorios e, por tanto, tampouco terán o deber de asumir os custos dos danos.

Por todo o exposto, a conselleira concluíu que á Xunta “non lle queda máis remedio” que acudir á vía xudicial para frear a aplicación dunha orde que, engadiu, o Miterd publicou hoxe sen previo aviso ás catro comunidades lobeiras que durante un ano traballaron de forma construtiva e facendo múltiples achegas para que esta medida non fora aprobada.

Deste xeito, no seu recurso contencioso-administrativo —no que actualmente traballan os servizos xurídicos da Consellería—, Galicia esixirá que se adopten medidas cautelarísimas de suspensión da orde, co fin de paralizar a súa eficacia práctica ata que exista un pronunciamento definitivo por parte da xustiza.

Imaxes relacionadas