Extinguido o incendio de Muíños, parroquia de Requiás, que afectou o parque do Xurés e activo un lume en Vilariño de Conso-Chaguazoso que afecta unhas 20 ha
O incendio de Muíños afectou unhas 5 hectáreas de territorio galego e para a súa extinción mobilizáronse medios de Galicia e de Portugal
O de Vilariño de Conso, parroquia de Chaguazoso, iniciouse ás 17,44 horas desta tarde e continúa activo
A Consellería do Medio Rural informa de que o incendio forestal rexistrado no concello ourensán de Muíños, parroquia de Requiás, quedou extinguido ás 20,49 horas de hoxe.
Este lume entrou en Galicia procedente de Portugal arredor das 16,00 h. e afectou unhas 5 hectáreas de monte raso, todas elas dentro do Parque Natural Baixa Limia-Serra do Xurés. Para extinguilo mobilizáronse 1 axente, 4 brigadas, 2 motobombas e 1 helicóptero do Servizo de Prevención e Defensa Contra Incendios Forestais da Xunta, ademais de medios de Portugal.
Vilariño de Conso
Por outra banda, arestora permanece activo outro lume no municipio ourensán de Vilariño de Conso, na parroquia de Chaguazoso, que se iniciou ás 17,44 h. e que, segundo as últimas estimacións, afecta arredor de 20 hectáreas. Para a súa extinción mobilizáronse 3 axentes, 6 brigadas e 1 motobomba.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.