Galicia prepárase para a adaptación dos grupos de acción local de pesca ao futuro fondo europeo

A directora xeral de Desenvolvemento Pesqueiro, Susana Rodríguez, reuniuse esta semana con representantes dos oito grupos de acción local do sector pesqueiro de Galicia para informarlles dos pasos a dar de cara á adaptación e configuración dos grupos de acción local de pesca no marco do futuro Fondo Europeo Marítimo de Pesca e Acuicultura (Fempa). Deste xeito, Galicia prepárase para aproveitar de xeito eficaz os fondos europeos destinados ao desenvolvemento socioeconómico das zonas costeiras.
Durante a xuntanza, na que tamén participaron outros técnicos da Xunta, expúxoselles aos representantes dos grupos o que establece o Fempa en relación ao desenvolvemento local participativo e ás estratexias nesta materia. Os representantes da Administración autonómica tamén explicaron os requisitos que deben seguir os proxectos que desenvolvan os grupos no marco da nova ferramenta de financiamento.
A reunión tamén serviu para dar conta dos pasos a seguir para a preparación das Estratexias de Desenvolvemento Local Participativo (EDLP) e das candidaturas dos grupos. A Xunta porá unha liña de axudas a disposición dos candidatos a grupos que resulten admitidos para a fase preparatoria e que teñen como obxectivo apoialos no desenvolvemento de accións de formación e estudos relativos á zona obxecto da estratexia. Esta orde de achegas, que se publicará no Diario Oficial de Galicia, cubrirá custos de asesoramento e accións relacionadas coas consultas ás partes interesadas para a elaboración das estratexias.
Ademais os representantes do Goberno galego explicaron os criterios de selección dos territorios de acción dos grupos, das estratexias e dos GALP. Unha vez seleccionados os candidatos a grupos de acción local do sector pesqueiro a Consellería do Mar asinará con estas entidades convenios para a elaboración das EDLP no marco do futuro fondo europeo.

Os GALP

Os actuais grupos de acción local do sector pesqueiro dan continuidade aos antigos grupos de acción costeira (GAC) e son asociacións sen ánimo de lucro colaboradoras da Consellería do Mar como axentes de desenvolvemento na aplicación da estratexia de desenvolvemento local participativo da zona pesqueira e na xestión e control das axudas que se tramitan para o desenvolvemento desa estratexia.
A actividade dos oito grupos que hai en Galicia dentro do programa operativo do Fondo Europeo Marítimo e de Pesca contribúe a mellorar a transformación, comercialización e posta en valor das producións pesqueiras, ao desenvolvemento dun sector turístico sustentable, á creación de empresas e á xeración de emprego e á diversificación do sector a través de iniciativas complementarias da actividade pesqueira como o turismo mariñeiro. Tamén contribúe á conservación e á valorización do patrimonio natural e cultural marítimo-pesqueiro.
Entre a primeira convocatoria de axudas a proxectos dos GALP, do ano 2016, e o 2020 os GALP de Galicia desenvolveron preto de 500 iniciativas que contaron cun total de axuda pública de máis de preto de 30 millóns de euros e catalizaron preto de 40 millóns de euros de investimento privado, o que supuxo un investimento total de máis de 70 millóns de euros.