Rueda avanzálles aos representantes do taxi en Galicia unha nova orde de axudas dotada con medio millón para a adquisición de vehículos adaptados, de emisión cero ou eco

Santiago de Compostela, 17 de novembro de 2022 O presidente da Xunta, Alfonso Rueda, avanzoulles hoxe aos representantes do taxi en Galicia unha nova orde de axudas para a adquisición de vehículos adaptados, de emisións cero ou ECO. A nova convocatoria, correspondente ao ano 2023, publicarase no Diario Oficial de Galicia (DOG) o vindeiro 24 de novembro e contará cun investimento de 500.000 €.

Nun encontro coa directiva da Federación de Autónomos do Taxi de Galicia (Fegataxi), que agrupa a 2.400 profesionais do sector en Galicia, Rueda deu a coñecer uns apoios que pretenden favorecer a renovación da frota de vehículos deste transporte esencial na Comunidade.

Así, con estes incentivos mellórase a accesibilidade ao transporte, facilitando a compra de taxis adaptados ás persoas con mobilidade reducida, ao tempo que se reduce a contaminación, incorporando modelos cualificados como de emisións cero ou de categoría ECO.

O presidente, que estivo acompañado da conselleira de Infraestruturas e Mobilidade, Ethel Vázquez, lembrou que a nova convocatoria sumarase aos apoios que o Goberno autonómico leva dedicado ao sector nos últimos anos. Deste xeito, e por medio desta liña, a Xunta leva concedidos desde 2016 un total de 4,5 M€ en axudas que beneficiaron a 745 taxistas. Incentivos aos que hai que sumar outras medidas como a aprobación da Lei do Taxi en 2013 e o regulamento que a desenvolve en 2018; ou o apoio a un taxi seguro durante a pandemia.