A Xunta pon en marcha o dispositivo para vacinar contra a gripe aos nenos e nenas no conxunto de hospitais galegos esta fin de semana
Esta campaña de vacinación está destinada á poboación pediátrica con idades comprendidas entre os 6 e os 59 meses
As citas envíanse vía SMS aos pais, nais ou titores dos menores, para acudir, o sábado e o domingo, aos puntos de vacinación dos 14 hospitais galegos, en horario de 10h a 14,30h; e de 15,30h a 20h
No que atinxe á campaña de vacinación contra a covid-19 para persoas maiores de 60 anos e grupos de risco, a Xunta decidiu pechar os grandes recintos o vindeiro día 30 de novembro. A partir do 1 de decembro, vacinarase nos hospitais a través do sistema de autocita
A Dirección Xeral de Saúde da Consellería de Sanidade xa ten preparado o dispositivo para vacinar esta fin de semana aos nenos e nenas, con idades comprendidas entre os 6 e os 59 meses, no conxunto de hospitais galegos.
A Xunta de Galicia acordou estender este programa a todas as áreas sanitarias galegas despois dos bos resultados obtidos na pilotaxe de vacinación pediátrica levada a cabo, a pasada fin de semana na área sanitaria de Santiago e A Barbanza.
Así, o lugar e os horarios de vacinación serán comunicados vía SMS aos pais, nais ou titores dos menores. Os nenos e nenas poderán ser convocados para vacinarse ao longo do sábado nun dos 14 hospitais públicos da Comunidade, que será o máis próximo ao seu domicilio, segundo conste na súa tarxeta sanitaria. Ao longo da xornada do domingo, vacinarase nos hospitais de Vigo, A Coruña, Santiago de Compostela, Ourense e Pontevedra. O horario de vacinación será de 10 a 14,30 horas e de 15,30 a 20 horas, en ambas xornadas, agás no caso de Ourense (que na xornada do domingo só vacinará en horario de mañá).
En concreto, a vacinación pediátrica levarase a cabo nos seguintes puntos dos centros hospitalarios galegos:
Deste xeito, a Xunta pon a disposición das familias galegas unha nova alternativa de vacinación para que poidan previr e protexerse contra a gripe.
30 de novembro, peche dos grande recintos de vacinación
Por outra banda, o vindeiro día 30 de novembro pecharase a vacinación simultánea da covid-19 e da gripe en grandes recintos, que estaba destinada destinada ás persoas adultas maiores de 60, e a poboación de risco.
A partir do día 1 de decembro, vacinarase nos hospitais a través do sistema de autocita.
Para elo, as axendas dos hospitais abriranse de luns a sábado (en horario de mañá), e tamén, dúas tardes á semana.
Así mesmo, no caso dos hospitais comarcais, abriranse as axendas tres días á semana pola mañá (un deles será o sábado), e unha tarde á semana.
A autocita pode solicitarse a través da páxina web www.sergas.es ou a través da aplicación SERGAS MOBIL.
Esta novas opcións de vacinación estarán activas ata o fin da campaña da gripe.
Galicia mantense como a comunidade autónoma coa mellor porcentaxe de persoas vacinadas coa segunda dose de reforzo da covid-19. Así, lidera a nivel nacional a vacinación nos tres grupos etarios deste ámbito -maiores de 80 anos; entre os 70 e os 79 anos, e 60 a 69 anos.
Imaxes relacionadas
