A Xunta está a traballar na aplicación dun modelo fiable de determinación da fixación de carbono nos montes galegos conforme aos mellores estándares internacionais

Madrid, 1 de decembro do 2022 O director xeral de Planificación e Ordenación Forestal, José Luis Chan, asistiu esta mañá en Madrid á 74º xunta directiva de PEFC España. Alí, destacou que  a Consellería do Medio Rural está a traballar na aplicación dun modelo fiable de determinación da fixación de carbono nos montes galegos conforme aos mellores estándares internacionais, co fin de facilitar que os propietarios se incorporen a estes mercados.

Neste senso, sinalou que este sistema de créditos de carbono será de carácter voluntario e servirá de nexo entre titulares e aquelas persoas, de natureza física ou xurídica, que desexen mercar créditos ben como intermediarios ou ben como axentes finais co fin de reducir ou facer nulas as súas emisións.

Precisamente, o director xeral lembrou que dende a Consellería do Medio Rural mantense o certificado PEFC de xestión forestal sustentable en 619 montes baixo a súa xestión, maioritariamente montes veciñais en man común en convenio coa Xunta. Estes, engadiu, suman unha superficie de 164.000 hectáreas, o que supón o 41% da superficie certificada en Galicia por PEFC. A nivel mundial, o selo PEFC contan cun total de 286 millóns de hectáreas certificadas, das cales 2,7 millóns de hectáreas correspóndense a España.

Nesta liña, José Luis Chan avanzou que as previsións para Galicia son que a superficie continúe crecendo nos próximos anos, grazas á xestión do Goberno galego, que inclúe automaticamente no seu Sistema de Xestión Forestal Sostible aqueles montes xestionados pola Administración que dispoñen dun instrumento de ordenación e xestión forestal. A listaxe dos montes ou unidades de xestión forestal incluídos no sistema actualízase mensualmente e poden consultarse a través da web da Consellería do Medio Rural.

Compromiso da Xunta

A certificación forestal sostible garante -ao máximo nivel, a través dun dos dous sistemas de certificación más implantados a nivel mundial- que a xestión dos bosques dos que proveñen estes produtos é respectuosa co medio ambiente, ao mesmo tempo que cumpren outras funcións ecolóxicas, económicas e sociais. 

A xestión forestal sostible certificada por terceiros independentes é un camiño ineludible para os xestores de propiedades forestais de cara a xustificar ante a sociedade que as súas accións non soamente non danarán senón que mellorarán o estado dos nosos bosques. Ademais, a madeira e outros produtos obtidos de bosques certificados garanten ao consumidor -a través do selo que figura neles- a súa sustentabilidade.

Así, esta iniciativa enmárcase nunha sociedade europea que se atopa en vías de descarbonización, coa vista posta nos retos e oportunidades que están a demandar o Pacto Verde Europeo e a transición á bioeconomía.